ᠲᠤᠩᠭᠠᠯᠠᠭ ᠲᠠᠮᠢᠷ
– ᠴ᠂ ᠯᠤᠳᠤᠢᠳᠠᠮᠪᠠ
ᠨᠢᠭᠡ — ᠬᠣᠶᠠᠷ
ᠡᠷᠳᠡᠨᠢ᠂ ᠬᠠᠷᠢ ᠨᠤᠲᠤᠭᠲᠤ ᠶᠠᠪᠠᠭᠠᠷᠠᠭᠰᠠᠨ ᠭᠣᠨᠢᠭ᠍ᠲᠣ᠌ ᠰᠦᠨᠢᠶᠢᠨ ᠤᠷᠢᠳᠤᠬᠢ ᠥᠷᠯᠥᠭᠡ ᠲᠠᠮᠢᠷᠤᠨ ᠬᠥᠨᠳᠡᠢᠳᠦ ᠥᠭᠡᠷᠡ ᠨᠢᠭᠡᠨ ᠬᠡᠷᠡᠭ ᠭᠠᠷᠴᠠᠢ᠃
ᠡᠮᠦᠨᠡᠭᠦᠷᠢᠶᠡᠨ ᠭᠠᠷᠤᠭᠰᠠᠨ ᠢᠯᠠᠭᠠᠶᠢ ᠡᠮᠬᠦᠬᠦ ᠭᠡᠳ ᠴᠢᠳᠠᠯ ᠦᠭᠡᠢ ᠠᠩᠭᠠᠢᠵᠤ ᠬᠣᠴᠣᠷᠣᠭᠰᠠᠨ ᠰᠢᠪᠠᠭᠤᠨᠤ ᠠᠮᠠ ᠰᠢᠭ᠋ ᠭᠣᠣᠯᠤᠨ ᠪᠠᠷᠠᠭᠤᠨ ᠲᠠᠯᠠ ᠤᠷᠤᠭᠤ ᠬᠣᠢᠨᠠᠡᠴᠡ ᠰᠢᠭᠠᠵᠤ ᠣᠷᠣᠭᠰᠠᠨ ᠤᠷᠲᠤ ᠠᠮᠠᠶᠢᠨ ᠠᠳᠠᠭ᠂ ᠥᠷᠭᠡᠨ ᠳᠡᠨᠵᠢ ᠳᠡᠭᠡᠷᠡ ᠳᠤᠮᠳᠠᠪᠠᠨ ᠬᠣᠨᠢᠨᠤ ᠬᠠᠰᠢᠶᠠ ᠲᠠᠢ ᠴᠢᠨᠳᠠᠮᠤᠨᠢᠯᠠᠨ ᠪᠠᠭᠤᠭᠰᠠᠨ ᠭᠤᠷᠪᠠᠨ ᠭᠡᠷ ᠬᠣᠲᠠ ᠠᠢᠯ ᠬᠠᠷᠠᠭᠳᠠᠨᠠ᠃
ᠪᠠᠷᠠᠭᠤᠨ ᠡᠮᠦᠨᠡᠬᠢ ᠲᠣᠮᠣ᠌ ᠭᠡᠷᠠᠴᠠ ᠬᠥᠬᠡ ᠳᠠᠯᠢᠩᠪᠣ ᠳᠡᠪᠡᠯ ᠲᠠᠢ᠂ ᠬᠠᠭᠤᠴᠢᠪᠳᠤᠷ ᠯᠣᠣᠴᠢᠨ ᠭᠤᠲᠤᠯ ᠡᠮᠦᠰᠦᠭᠰᠡᠨ᠂ ᠰᠡᠢᠯᠦᠮᠡᠯ ᠲᠡᠮᠦᠷ ᠬᠡᠲᠡ ᠪᠠᠯ ᠲᠠᠢ᠂ ᠣᠢᠰᠣᠨ ᠡᠰᠢ ᠲᠠᠢ ᠬᠢᠲᠤᠭᠠ ᠵᠡᠬᠦᠭᠰᠡᠨ᠂ ᠭᠢᠯᠠᠯᠵᠠᠭᠰᠠᠨ ᠳᠤᠭᠤᠢ ᠪᠤᠷᠤ ᠴᠢᠷᠠᠢ ᠲᠠᠢ᠂ ᠲᠣᠭᠲᠠᠵᠤ ᠶᠠᠳᠠᠭᠰᠠᠨ ᠳᠠᠪᠬᠤᠷᠠ ᠠᠯᠠᠭ ᠬᠤᠷᠴᠠ ᠨᠢᠳᠦ ᠲᠠᠢ᠂ ᠪᠦᠳᠦᠭᠦᠨ ᠬᠠᠷᠠ ᠭᠡᠵᠢᠭᠡ ᠲᠠᠢ ᠬᠥᠮᠥᠨ ᠭᠠᠷᠴᠤ ᠢᠷᠡᠭᠡᠳ ᠳᠦᠩᠭᠡᠵᠢ ᠲᠡᠮᠳᠡᠭ ᠣᠷᠣᠵᠤ ᠪᠠᠢᠭᠠ ᠦᠷᠦᠨ ᠭᠡᠭᠡᠨᠳᠦ ᠳᠦᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰᠢ ᠠᠵᠢᠭ᠍ᠯᠠᠨ ᠵᠣᠭᠰᠣᠪᠠ᠃
ᠡᠨᠡ ᠬᠥᠮᠥᠨᠢ ᠢᠲᠡᠭᠡᠯᠲᠦ ᠭᠡᠳᠡᠭ᠃ ᠣᠳᠣ᠌ ᠭᠤᠴᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠢᠲᠡᠭᠡᠯᠲᠦ ᠶᠠᠮᠠᠷᠴᠤ ᠢᠵᠠᠭᠤᠷ ᠤᠭᠰᠠᠭᠠ ᠦᠭᠡᠢ᠃ ᠡᠴᠢᠭᠡᠠᠴᠠ ᠣᠯᠠᠮᠵᠢᠯᠠᠭᠰᠠᠨ ᠥᠪ ᠬᠥᠷᠥᠩᠭᠡ ᠪᠠᠭᠠ ᠪᠣᠯᠪᠠᠴᠤ ᠬᠠᠢᠷᠭᠤ ᠴᠢᠯᠠᠭᠤ ᠮᠡᠷᠡᠬᠦᠠᠴᠠ ᠪᠣᠰᠤᠳᠢ ᠬᠢᠵᠦ ᠪᠠᠢᠭᠠᠳ ᠯᠤᠤ ᠭᠦᠩᠦᠨ ᠬᠣᠰᠢᠭᠤᠨᠤ ᠲᠡᠷᠢᠭᠦᠨ ᠪᠠᠶᠠᠨᠤ ᠨᠢᠭᠡ ᠪᠣᠯᠵᠠᠢ᠃ ᠠᠷᠪᠠᠨ ᠶᠢᠰᠦᠨ ᠨᠠᠰᠤᠨᠳᠠᠭᠠᠨ ᠳᠠᠯᠠᠢᠴᠣᠢᠩᠬᠤᠷ ᠸᠠᠩᠤᠨ ᠯᠣᠪᠰᠠᠩ ᠲᠠᠢᠵᠢᠶᠢᠨ ᠥᠬᠢᠨᠢ ᠶᠣᠰᠣᠯᠠᠨ ᠠᠪᠴᠤ ᠥᠮᠴᠢᠨ ᠳ᠋ᠤᠨᠢ ᠣᠪᠣᠭᠠ ᠮᠠᠯ ᠠᠪᠤᠭᠰᠠᠨ ᠨᠢ ᠬᠥᠷᠥᠩᠭᠡᠵᠢᠬᠦᠶᠢᠨ ᠡᠬᠢ ᠰᠣᠷᠪᠣᠯᠵᠢ ᠪᠣᠯᠵᠠᠢ᠃ ᠭᠠᠳᠠᠨᠠᠪᠠᠨ ᠴᠥᠭᠡᠨ ᠮᠠᠯ ᠪᠠᠢᠯᠭᠠᠵᠤ ᠪᠤᠰᠤᠳᠢ ᠬᠡᠳᠦᠨ ᠬᠣᠰᠢᠭᠣᠨᠤ ᠶᠠᠳᠠᠭᠤᠴᠤᠳᠲᠤ ᠰᠠᠭᠤᠷᠢᠯᠠᠨ ᠥᠭᠴᠦ ᠬᠠᠷᠢᠭᠤᠯᠤᠭᠤᠯᠳᠠᠭ ᠠᠵᠠᠢ᠃
ᠢᠳᠡᠭᠡᠯᠲᠥ᠍ᠶᠢᠨ ᠪᠦᠯᠢ ᠭᠡᠪᠡᠯ ᠡᠬᠡᠨᠡᠷ ᠲᠣᠯᠵᠢᠨ᠂ ᠠᠷᠪᠠᠨ ᠨᠠᠰᠤᠲᠠᠢ ᠬᠦᠦ ᠬᠣᠩᠭᠣᠷ᠂ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠥᠬᠢᠨ ᠰᠣᠯᠣᠩᠭᠠ ᠡᠢᠮᠦ ᠳᠥᠷᠪᠡᠨ ᠬᠠᠯᠠᠭᠤᠨ ᠠᠮᠢ ᠪᠢᠯᠡ᠃ ᠢᠳᠡᠭᠡᠯᠲᠥ᠍ ᠦᠷᠦᠨ ᠭᠡᠭᠡ ᠴᠠᠢᠬᠤᠡᠴᠡ ᠡᠬᠢᠯᠡᠭᠡᠳ ᠦᠳᠡᠰᠢᠶᠢᠨ ᠪᠦᠷᠦᠩᠬᠦᠢ ᠪᠣᠯᠲᠠᠯᠠ ᠪᠣᠷᠪᠢ ᠪᠣᠬᠢᠰᠬᠢᠬᠣ᠌ ᠦᠭᠡᠢ ᠶᠠᠭᠤᠮᠠ ᠬᠢᠵᠦ ᠪᠠᠢᠳᠠᠭ᠃ ᠬᠠᠪᠢ ᠣᠢᠷᠠᠶᠢᠨ ᠬᠥᠮᠥᠰᠢᠶᠡᠨ ᠴᠤ᠌ ᠶᠠᠭ ᠲᠡᠢᠮᠦ ᠪᠠᠢᠯᠭᠠᠬᠤᠶᠢ ᠬᠢᠴᠢᠶᠡᠳᠡᠭ᠃ ᠡᠨᠡ ᠴᠤ᠌ ᠤᠴᠢᠷᠡᠴᠡ ᠡᠬᠡᠨᠡᠷ ᠲᠣᠯᠵᠢᠨ ᠨᠢ ᠪᠣᠰᠣᠳᠡᠴᠡ ᠲᠥᠷᠦᠭᠦᠨᠳᠦ ᠪᠣᠰᠣᠭᠠᠳ᠂ ᠪᠣᠰᠣᠳᠡᠴᠡ ᠲᠥᠷᠦᠭᠦᠨᠳᠦ ᠦᠨᠢᠶᠡᠪᠡᠨ ᠰᠠᠭᠠᠵᠤ ᠪᠡᠯᠴᠢᠭᠡᠳᠡᠭ ᠵᠠᠩᠰᠢᠯ ᠲᠠᠢ᠃ ᠬᠡᠷᠪᠡ ᠠᠯᠢ ᠨᠢᠭᠡᠨ ᠠᠢᠯᠡᠴᠡ ᠬᠣᠵᠢᠮᠳᠠᠪᠠᠯ ᠲᠡᠷᠡ ᠡᠳᠦᠷᠲᠡᠬᠡᠨ ᠲᠠᠭᠤ ᠱᠤᠤ ᠦᠭᠡᠢ ᠠᠭᠤᠷᠯᠠᠨ ᠶᠠᠪᠤᠳᠠᠭ᠃ ᠡᠨᠡ ᠵᠠᠩᠢ ᠨᠢ ᠮᠡᠳᠡᠳᠡᠭ ᠵᠠᠷᠤᠴᠠ ᠨᠠᠷ ᠨᠢ ᠶᠡᠬᠡ ᠭᠡᠷᠦᠨ ᠴᠠᠢᠶᠢᠨ ᠤᠭᠤᠷ ᠳᠤᠤᠭᠠᠷᠬᠤᠡᠴᠡ ᠨᠠᠰᠢ ᠪᠣᠰᠳᠠᠭ ᠦᠭᠡᠢ᠃
ᠢᠲᠡᠭᠡᠯᠲᠦ ᠬᠡᠰᠡᠭ ᠵᠣᠭᠰᠣᠵᠤ᠂ ᠬᠡᠳᠦ ᠲᠠᠬᠢᠨ ᠰᠤᠨᠢᠶᠠᠪᠠ᠃
– ᠲᠣᠯᠵᠢᠨ ᠡ᠂ ᠬᠦᠦᠶᠢ ᠪᠣᠰᠬᠠᠭᠠᠳ ᠦᠨᠢᠶᠡᠨᠳᠦ ᠶᠠᠪᠤᠭᠤᠯ᠃ ᠰᠠᠢᠬᠠᠨ ᠡᠳᠦᠷ ᠪᠣᠯᠬᠤ ᠨᠢ ᠭᠡᠵᠦ ᠨᠠᠷᠢᠨ ᠴᠠᠷᠭᠢᠶᠠ ᠳᠠᠭᠤᠪᠠᠷ ᠬᠡᠯᠡᠭᠡᠳ ᠬᠤᠢᠲᠤ ᠭᠡᠷ ᠤᠷᠤᠭᠤ ᠭᠦᠶᠦᠨ ᠣᠴᠢᠵᠤ ᠡᠷᠦᠬᠡᠶᠢ ᠲᠠᠲᠠᠭᠠᠳ᠂
– ᠳᠤᠯᠮᠠ ᠡ᠂ ᠪᠣᠰᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠵᠡᠭᠦᠨ ᠭᠡᠷ ᠤᠷᠤᠭᠤ ᠠᠯᠬᠤᠳᠠᠯᠠ ᠭᠡᠷᠠᠴᠠ ᠠᠬᠢᠮᠠᠭ ᠨᠠᠰᠤᠨᠤ ᠠᠪᠠᠭᠠᠢ ᠭᠠᠷᠴᠤ ᠢᠷᠡᠭᠡᠳ ᠡᠷᠦᠬᠡᠪᠡᠨ ᠲᠠᠲᠠᠯᠠ᠃ ᠬᠣᠢᠲᠤ ᠵᠢᠵᠢᠭ᠌ ᠭᠡᠷᠲᠦ ᠢᠲᠡᠭᠡᠯᠲᠦᠶᠢᠨ ᠠᠳᠤᠭᠤᠴᠢᠨ ᠭᠠᠯᠰᠠᠩ᠂ ᠡᠬᠡᠨᠡᠷ ᠲᠤᠯᠮᠠᠶᠢᠨ ᠬᠠᠮᠲᠤ ᠪᠠᠢᠳᠠᠭ᠃ ᠵᠡᠭᠦᠨ ᠭᠡᠷᠲᠦ ᠬᠤᠨᠢᠴᠢᠨ ᠨᠢᠮᠠ᠂ ᠡᠬᠡᠨᠡᠷ ᠬᠡᠰᠢᠭᠲᠦ᠂ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠥᠬᠢᠨ ᠰᠥᠷᠥᠩᠦᠨ ᠬᠠᠮᠲᠤ ᠪᠠᠢᠳᠠᠭ᠃
ᠢᠳᠡᠭᠡᠯᠲᠥ᠍ᠶᠢᠨ ᠨᠢᠷᠤᠭᠤ ᠨᠠᠮᠬᠠᠨ᠂ ᠲᠣᠷᠣᠩᠬᠠᠢ ᠪᠣᠯᠪᠠᠴᠤ᠂ ᠪᠣᠯᠴᠢᠩ ᠰᠢᠷᠪᠦᠰᠦ ᠪᠣᠯᠣᠭᠰᠠᠨ ᠪᠡᠶᠡ ᠨᠢ ᠭᠦᠶᠦᠵᠦ ᠦᠰᠦᠷᠴᠦ ᠶᠠᠪᠤᠬᠤᠪᠠᠷ ᠵᠣᠷᠢᠭᠤᠳᠠ ᠵᠠᠶᠠᠭᠠᠭᠳᠠᠭᠰᠠᠨ ᠮᠡᠲᠦ ᠪᠦᠭᠡᠳ ᠨᠤᠲᠤᠭᠤᠨ ᠬᠢᠨ ᠨᠢ 《 ᠳᠡᠪᠡᠭᠡᠷᠡᠭᠡ ᠢᠳᠡᠭᠡᠯᠲᠥ᠍ 》 ᠭᠡᠵᠦ ᠬᠣᠴᠢᠯᠠᠳᠠᠭ᠃ ᠢᠳᠡᠭᠡᠯᠲᠥ᠍ ᠱᠣᠭᠰᠢᠭ᠍ᠰᠠᠭᠠᠷ ᠭᠡᠷᠦᠨᠢᠶᠡᠨ ᠭᠠᠳᠠᠨᠠ ᠣᠴᠢᠬᠤᠳᠤ ᠬᠦᠦ ᠬᠣᠩᠭᠣᠷ ᠨᠢ ᠨᠢᠳᠦᠪᠡᠨ ᠨᠤᠬᠤᠯᠠᠨ ᠭᠠᠷᠴᠤ ᠢᠷᠡᠪᠡ᠃
– ᠮᠠᠭᠤ ᠬᠦᠮᠦᠨᠦ ᠨᠣᠢᠷ᠂ ᠮᠣᠯᠭᠤᠤ ᠬᠥᠮᠥᠨᠦ ᠰᠢᠯᠦᠰᠦ ᠭᠡᠭᠴᠢᠪᠡᠷ ᠨᠤᠢᠷᠮᠤᠭᠯᠠᠭᠠᠳ᠂ ᠵᠠᠶᠠᠭᠠ ᠨᠢ ᠣᠷᠬᠢᠭ᠍ᠰᠠᠨ ᠳᠠᠷᠢᠬᠢ᠃ ᠪᠣᠰᠢᠭᠤᠬᠠᠨ ᠦᠨᠢᠶᠡᠪᠡᠨ ᠬᠤᠷᠢᠶᠠᠭᠠᠳ ᠢᠷᠡ ᠭᠡᠵᠦ ᠲᠡᠷᠲᠡᠭᠡ ᠬᠣᠢᠲᠦ ᠡᠩᠭᠡᠷᠲᠦ ᠢᠳᠡᠬᠦ ᠨᠢ ᠢᠳᠡᠵᠦ᠂ ᠬᠡᠪᠲᠡᠬᠦ ᠨᠢ ᠬᠡᠪᠲᠡᠵᠦ ᠪᠠᠢᠭᠠ ᠰᠠᠷᠯᠤᠭ ᠬᠠᠢᠨᠤᠭ ᠭᠣᠣᠯᠳᠠᠭᠤ ᠦᠬᠡᠷ ᠤᠷᠤᠭᠤ ᠵᠢᠭᠠᠪᠠ᠃
ᠬᠣᠩᠭᠣᠷ ᠪᠤᠷᠭᠠᠰᠤᠨ ᠰᠢᠯᠪᠢᠭᠦᠷ ᠠᠪᠴᠤ ᠮᠣᠷᠳᠠᠨ ᠭᠦᠶᠦᠬᠦ ᠭᠡᠬᠦ ᠳ᠋ᠤᠨᠢ 《 ᠮᠣᠳᠣ᠌ ᠪᠢᠳᠡᠭᠡᠢ ᠤᠨᠤ᠂ ᠵᠠᠶᠠᠭᠠ ᠨᠢ ᠣᠷᠬᠢᠭ᠍ᠰᠠᠨ ᠲᠠᠷᠢᠬᠢ 》 ᠭᠡᠵᠦ ᠡᠴᠢᠭᠡ ᠨᠢ ᠵᠢᠮᠡᠯᠡᠨ ᠵᠤᠭᠰᠣᠭᠠᠪᠠ᠃ ᠢᠳᠡᠭᠡᠯᠲᠥ᠍᠂ ᠲᠠᠮᠢᠷᠤᠨ ᠨᠥᠭᠦᠭᠡ ᠲᠠᠯᠠᠶᠢᠨ ᠮᠣᠳᠣ᠌ ᠲᠠᠢ ᠠᠭᠤᠯᠠᠶᠢᠨ ᠠᠷᠤᠳᠤ ᠢᠳᠡᠵᠦ ᠪᠠᠢᠭᠠ ᠬᠤᠶᠠᠷ ᠮᠣᠷᠢᠶᠢ ᠠᠵᠢᠭ᠍ᠯᠠᠨ ᠬᠠᠷᠠᠭᠰᠠᠨᠢᠶᠠᠨ ᠰᠢᠭᠤᠳ ᠶᠠᠪᠤᠵᠤ ᠬᠣᠨᠢᠨᠤ ᠬᠠᠰᠢᠶᠠ ᠪᠡᠨ ᠨᠡᠭᠡᠭᠡᠪᠡ᠃
ᠡᠨᠡ ᠦᠶᠡᠳᠦ ᠨᠢᠮᠠ ᠪᠦᠰᠡᠪᠡᠨ ᠪᠦᠰᠡᠯᠡᠭᠰᠡᠭᠡᠷ ᠢᠷᠡᠭᠡᠳ᠄ << ᠰᠠᠢᠨ ᠤᠨᠳᠠᠪᠠ ᠦᠦ？ ᠤᠯᠤᠰ ᠪᠢᠳᠡ ᠬᠣᠶᠠᠷᠢ ᠬᠡᠨ ᠨᠢ ᠪᠠᠶᠠᠨ ᠢᠳᠡᠭᠡᠯᠲᠥ᠍᠂ ᠬᠡᠨ ᠨᠢ ᠬᠣᠨᠢᠴᠢᠨ ᠨᠢᠮᠠ ᠭᠡᠳᠡᠭᠢ ᠳᠠᠭᠠᠵᠤ ᠣᠯᠬᠤ ᠭᠡᠵᠦ ᠵᠦᠳᠡᠷᠡᠳᠡᠭ ᠪᠣᠯᠤᠯᠲᠠᠢ >> ᠭᠡᠵᠦ ᠪᠦᠳᠦᠭᠦᠨ ᠫᠠᠷᠭᠢᠶᠠ ᠳᠠᠭᠤᠪᠠᠷ ᠬᠡᠯᠡᠪᠡ᠃
– ᠳᠠᠭᠠᠵᠤ ᠯᠡ ᠪᠠᠢᠭ᠋ ᠭᠡᠳ ᠢᠳᠡᠭᠡᠯᠲᠥ᠍ ᠬᠣᠭᠣᠯᠠᠢᠳᠠᠭᠠᠨ ᠵᠠᠯᠢ ᠲᠠᠢ ᠢᠨᠢᠶᠡᠭᠰᠡᠨᠢᠶᠡᠨ << ᠨᠢᠮᠠ ᠭᠣᠸᠠᠢ᠂ ᠫᠦᠷᠪᠦ ᠲᠠᠢᠵᠢᠶᠢᠨ ᠠᠳᠤᠭᠤᠴᠢᠨᠤ ᠰᠤᠷᠠᠭᠯᠠᠵᠤ ᠶᠠᠪᠣᠭᠰᠠᠨ ᠬᠤᠶᠠᠷ ᠲᠡᠷᠡ ᠪᠠᠢᠨᠠ >> ᠭᠡᠵᠦ ᠨᠥᠭᠦᠭᠡ ᠬᠤᠶᠠᠷ ᠮᠣᠷᠢᠶᠢ ᠵᠢᠭᠠᠪᠠ᠃
– ᠪᠠᠷᠢᠵᠤ ᠠᠪᠤᠭᠠᠳ᠂ ᠢᠷᠡᠵᠦ ᠠᠪᠲᠠᠯᠠ ᠨᠢ ᠬᠣᠨᠢᠨᠳᠤ ᠲᠠᠯᠬᠢᠵᠤ ᠣᠷᠬᠢᠬᠤ ᠶᠤᠮᠰᠠᠨ ᠭᠡᠵᠦ ᠢᠳᠡᠭᠡᠯᠲᠥ᠍ᠶᠢᠨ ᠪᠣᠳᠣᠯᠢ ᠳᠠᠭᠠᠭᠰᠠᠨ ᠮᠡᠲᠦ ᠨᠢᠮᠠ ᠬᠡᠯᠡᠪᠡ᠃
– ᠠᠳᠣᠭᠣ᠌ ᠢᠷᠡᠬᠦᠪᠡᠷ ᠲᠠ ᠮᠣᠷᠳᠠᠭᠠᠳ ᠬᠦᠭᠡᠭᠡᠭᠡᠳ ᠢᠷᠡ ᠯᠡ ᠳᠠ᠂ ᠣᠷᠤᠵᠤ ᠠᠢᠷᠠᠭ ᠤᠤᠭᠤᠶᠠ ᠭᠡᠳ ᠢᠳᠡᠭᠡᠯᠲᠥ᠍ ᠭᠡᠷᠦᠨᠢᠶᠡᠨ ᠵᠦᠭ ᠶᠠᠪᠤᠬᠤᠳᠤ ᠨᠢᠮᠠ ᠳᠠᠭᠠᠪᠠ᠃
ᠬᠣᠩᠭᠣᠷ ᠬᠦᠦ ᠭᠦᠶᠦᠭᠰᠡᠭᠡᠷ ᠭᠦᠨ ᠵᠢᠯᠠᠭᠠᠨᠤ ᠡᠬᠢᠪᠡᠷ ᠭᠠᠷᠬᠤ ᠭᠡᠲᠡᠯᠡ ᠢᠷᠤᠭᠠᠯᠳᠤ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠭᠠᠷᠬᠤᠳᠤ ᠵᠣᠭ ᠲᠤᠰᠤᠨ ᠵᠣᠭᠰᠣᠵᠤ ᠬᠠᠷᠠᠯᠠ᠃
– ᠳᠡᠭᠦᠦ ᠮᠢᠨᠢ ᠭᠦᠶᠦᠭᠡᠳ ᠢᠷᠡ ᠭᠡᠵᠦ ᠲᠡᠷᠳᠡᠭᠡ ᠳᠣᠣᠷᠠᠡᠴᠡ ᠪᠦᠳᠦᠭᠦᠨ ᠲᠠᠭᠤ ᠲᠠᠢ ᠬᠥᠮᠥᠨ ᠳᠤᠤᠭᠠᠷᠪᠠ᠃ ᠠᠵᠢᠭ᠍ᠯᠠᠪᠠᠯ ᠲᠡᠷᠡ ᠳᠤᠤᠷᠠ ᠬᠥᠮᠥᠨ ᠭᠡᠬᠦᠳᠦ ᠴᠤ᠌ ᠪᠡᠷᠬᠡ᠂ ᠪᠢᠰᠢ ᠭᠡᠬᠦᠳᠦ ᠴᠤ᠌ ᠪᠡᠷᠬᠡ ᠨᠢᠭᠡ ᠶᠠᠭᠤᠮᠠ ᠬᠥᠳᠡᠯᠵᠦ ᠪᠠᠢᠪᠠ᠃
– ᠳᠡᠭᠦᠦ ᠮᠢᠨᠢ ᠪᠢᠳᠡᠬᠡᠢ ᠠᠶᠤ᠃ ᠠᠬᠠ ᠨᠢ ᠨᠢᠭᠡ ᠶᠠᠳᠠᠷᠠᠭᠰᠠᠨ ᠬᠥᠮᠥᠨ ᠪᠠᠢᠨᠠ ᠭᠡᠵᠦ ᠫᠠᠷᠭᠢᠭ᠍ᠰᠠᠨ ᠳᠠᠭᠤᠪᠠᠷ ᠬᠡᠯᠡᠬᠦᠳᠦ ᠬᠣᠩᠭᠣᠷ ᠵᠢᠯᠠᠭᠠ ᠤᠷᠤᠭᠤ ᠣᠷᠣᠵᠤ ᠣᠢᠷᠠᠲᠤᠨ ᠣᠴᠢᠪᠠ᠃
– ᠪᠢ ᠬᠥᠮᠥᠨ᠃ ᠳᠡᠭᠦᠦ ᠮᠢᠨᠢ ᠬᠦᠷᠦᠭᠡᠳ ᠢᠷᠡ᠃
ᠲᠡᠷᠡ ᠪᠣᠯ ᠠᠷᠭᠠ ᠦᠭᠡᠢ ᠯᠡ ᠬᠦᠮᠦᠨ ᠪᠠᠢᠯᠠ᠃ ᠴᠢᠩᠬᠢᠬᠦᠳᠡᠭᠡᠨ ᠬᠣᠶᠠᠷ ᠭᠠᠷ ᠦᠭᠡᠢ ᠬᠥᠮᠥᠨ ᠬᠡᠪᠲᠡᠵᠦ ᠪᠠᠢᠪᠠ᠃ ᠭᠬᠢᠷ ᠬᠥᠯᠥᠰᠦᠨᠳᠦ ᠪᠠᠷᠢᠭ᠍ᠳᠠᠵᠤ᠂ ᠦᠰᠦ ᠰᠠᠬᠠᠯ ᠨᠢ ᠤᠷᠭᠤᠭᠠᠳ ᠡᠷᠭᠢ ᠮᠥᠷᠭᠦᠵᠦ ᠪᠠᠢᠭᠠᠳ ᠭᠠᠷᠤᠭᠰᠠᠨ ᠰᠠᠷᠯᠤᠭᠤᠨ ᠪᠤᠬᠠ ᠰᠢᠭ᠋ ᠪᠣᠯᠣᠭᠰᠠᠨ ᠲᠡᠷᠡ ᠬᠥᠮᠥᠨᠦ ᠨᠢᠭᠤᠷᠲᠤ ᠬᠤᠶᠠᠷ ᠨᠢᠳᠦ ᠬᠢᠯᠠᠯᠵᠠᠵᠤ ᠪᠠᠢᠯᠠ᠃
– ᠡᠷᠡ ᠬᠦᠮᠦᠨ᠂ ᠡᠷᠡ ᠬᠥᠮᠥᠨᠠᠴᠠᠪᠠᠨ ᠠᠶᠤᠬᠤ ᠬᠡᠷᠡᠭ ᠦᠭᠡᠢ ᠭᠡᠳ ᠲᠡᠷᠡ ᠬᠥᠮᠥᠨ ᠢᠨᠢᠶᠡᠮᠰᠦᠭᠯᠡᠪᠡ᠃
– ᠪᠢ ᠠᠶᠤᠭᠠ ᠦᠭᠡᠢ ᠭᠡᠳ ᠬᠦᠦ ᠡᠪ ᠦᠭᠡᠢ ᠶᠠᠭᠤᠮᠠ ᠭᠠᠷᠪᠠᠯ ᠪᠣᠴᠠᠭᠠᠳ ᠵᠢᠭᠤᠳᠠᠬᠤᠳᠤ ᠪᠡᠯᠡᠬᠡᠨ ᠠᠯᠭᠤᠷᠬᠠᠨ ᠣᠢᠷᠠᠲᠤᠪᠠ᠃
ᠬᠠᠳᠠᠭᠰᠠᠨ ᠰᠢᠷᠢᠨ ᠬᠥᠨᠵᠢᠯᠡ ᠳᠣᠲᠤᠷᠠ ᠵᠥᠪᠬᠡᠨ ᠲᠣᠯᠣᠭᠠᠢᠪᠠᠨ ᠭᠠᠷᠭᠠᠭᠠᠳ ᠬᠡᠪᠳᠠᠵᠦ ᠪᠠᠢᠭᠠ ᠲᠡᠷᠡ ᠬᠥᠮᠥᠨᠦ ᠨᠢᠳᠦ ᠭᠢᠯᠠᠯᠵᠠᠨ᠂ ᠴᠡᠯᠮᠡᠭ ᠬᠥᠬᠡ ᠲᠡᠭᠷᠢ ᠥᠭᠡᠳᠡ ᠴᠠᠪᠴᠢᠯ ᠦᠭᠡᠢ ᠰᠢᠷᠲᠡᠵᠦ ᠪᠠᠢᠪᠠ᠃
– ᠠᠬᠠ ᠡ᠂ ᠲᠠ ᠪᠣᠰ ᠯᠡ ᠳᠠ᠃
– ᠠᠬᠠ ᠨᠢ ᠰᠢᠷᠢᠯᠡᠭᠳᠡᠭᠰᠡᠨ ᠬᠥᠮᠥᠨ᠃ ᠯᠤᠤ ᠭᠥᠩᠦᠨ ᠲᠠᠮᠠᠭᠠᠨ ᠳᠡᠭᠡᠷᠡᠠᠴᠠ ᠣᠷᠭᠣᠭᠠᠳ ᠡᠨᠳᠡ ᠢᠷᠡᠯᠡ᠃ ᠬᠥᠮᠥᠨ ᠮᠡᠳᠡᠪᠡᠯ ᠨᠠᠮᠠᠶᠢ ᠪᠠᠷᠢᠵᠤ ᠠᠪᠤᠭᠠᠳ ᠠᠯᠠᠨᠠ᠃ ᠭᠡᠪᠡᠴᠦ ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠪᠤᠯᠬᠤᠷ ᠠᠬᠠᠳᠠᠭᠠᠨ ᠲᠤᠰᠠ ᠪᠤᠯᠬᠣ᠌ ᠪᠠᠢᠬᠠ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠨᠠ ᠭᠡᠯᠡ᠃
<<ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠᠲᠠᠢ>> ᠭᠡᠳᠡᠭ ᠦᠭᠡ ᠬᠣᠩᠭᠣᠷᠤᠨ ᠰᠡᠳᠬᠢᠯᠳᠦ ᠬᠠᠷᠪᠤᠨ ᠣᠷᠣᠵᠤ᠂ ᠪᠠᠶᠠᠷ ᠲᠠᠢ ᠢᠨᠢᠶᠡᠮᠰᠦᠭᠯᠡᠨ᠂ ᠶᠡᠬᠡᠮᠰᠦᠭᠢᠶᠡᠷ ᠬᠣᠭᠣᠯᠠᠢᠪᠠᠨ ᠳᠦᠷᠢᠵᠦ ᠵᠠᠰᠠᠭᠠᠳ᠄
– ᠪᠢ ᠲᠠᠨᠳᠤ ᠶᠠᠭᠠᠬᠢᠵᠤ ᠲᠤᠰᠠ ᠪᠣᠯᠬᠤ ᠪᠤᠢ？ ᠭᠡᠵᠦ ᠬᠢᠮᠡᠯ ᠪᠦᠳᠦᠭᠦᠨ ᠲᠠᠭᠤᠪᠠᠷ ᠠᠰᠠᠭᠤᠭᠠᠳ ᠬᠠᠵᠠᠭᠤ ᠳ᠋ᠤᠨᠢ ᠲᠤᠯᠵᠤ ᠣᠴᠢᠪᠠ᠃
– ᠳᠡᠭᠦᠦ ᠮᠢᠨᠢ ᠬᠤᠷᠴᠠ ᠬᠢᠳᠤᠭᠠ᠂ ᠴᠢᠳᠠᠪᠠᠯ ᠳᠡᠪᠡᠯ ᠬᠣᠪᠴᠠᠰᠦ᠂ ᠬᠠᠵᠠᠭᠠᠷ᠂ ᠢᠳᠡᠬᠦ ᠶᠠᠭᠤᠮᠠ ᠠᠪᠴᠢᠷᠠ᠃ ᠬᠠᠷᠢᠨ ᠠᠬᠠᠶᠢᠪᠡᠨ ᠬᠡᠨᠳᠦ ᠴᠤ᠌ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠳ ᠲᠡᠷᠡ ᠬᠥᠮᠥᠨ ᠢᠨᠢᠶᠡᠮᠰᠦᠭᠯᠡᠵᠦ ᠲᠣᠮᠤ ᠬᠠᠷᠠ ᠨᠢᠳᠦᠪᠡᠨ ᠢᠷᠮᠡᠯᠡ᠃
– ᠪᠢ ᠴᠤ᠌ ᠡᠷᠡ ᠬᠥᠮᠥᠨ᠂ ᠲᠠ ᠴᠤ᠌ ᠡᠷᠡ ᠬᠦᠮᠦᠨ᠂ ᠵᠣᠳᠣᠭᠰᠠᠨ ᠴᠤ᠌ ᠬᠡᠯᠡᠬᠦ ᠦᠭᠡᠢ᠃ ᠪᠥᠭᠦᠳᠡᠶᠢ ᠠᠪᠤᠭᠠᠳ ᠢᠷᠡᠨᠡ ᠭᠡᠳ ᠬᠣᠩᠭᠣᠷ ᠶᠠᠪᠤᠬᠤ ᠭᠡᠰᠡᠨᠢᠶᠡᠨ᠄
– ᠠᠬᠠ ᠡ᠂ ᠪᠢ ᠤᠷᠢᠳᠠᠪᠠᠷ ᠦᠨᠢᠶᠡᠪᠡᠨ ᠠᠪᠠᠴᠢᠵᠤ ᠦᠭᠭᠦᠨᠡ᠃ ᠲᠠ ᠬᠦᠯᠢᠶᠡᠵᠦ ᠪᠠᠢᠭᠠᠷᠠᠢ᠃ ᠪᠢ ᠵᠠᠪᠠᠯ ᠢᠷᠡᠨᠡ ᠭᠡᠳ ᠭᠦᠶᠦᠨ ᠣᠳᠤᠯᠠ᠃
ᠰᠢᠷᠢᠲᠠᠢ ᠬᠡᠪᠲᠡᠵᠦ ᠪᠠᠢᠭᠠ ᠡᠨᠡ ᠬᠦᠮᠦᠨᠢ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠳᠡᠭ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠯᠤᠤ ᠭᠦᠩᠦᠨ ᠨᠣᠶᠠᠨ ᠰᠦᠷᠦᠭᠠᠴᠠ ᠲᠠᠰᠤᠯᠵᠤ ᠬᠥᠭᠡᠭᠡᠭᠡᠳ ᠭᠡᠨᠡᠳᠲᠡ ᠦᠶᠡᠷᠯᠡᠭᠰᠡᠨ ᠲᠠᠮᠢᠷᠤᠨ ᠭᠤᠤᠯᠳᠤ ᠮᠣᠷᠢᠨᠡᠴᠡᠪᠡᠨ ᠰᠠᠯᠵᠤ ᠦᠬᠦᠬᠦᠶᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠠᠪᠤᠷᠠᠭᠳᠠᠬᠤᠶᠢᠨ ᠬᠠᠮᠲᠤ ᠪᠠᠷᠢᠭ᠍ᠳᠠᠵᠤ ᠬᠡᠳᠦ ᠬᠤᠨᠤᠭ ᠵᠠᠨᠴᠢᠭ᠍ᠳᠠᠨ ᠪᠠᠢᠴᠠᠭᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠨᠤᠲᠤᠭ ᠤᠰᠤ᠂ ᠨᠡᠷᠡ ᠠᠯᠳᠠᠷᠢᠶᠠᠨ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠡᠳᠦ ᠬᠡᠳᠦᠨ ᠬᠥᠮᠥᠨ ᠲᠠᠨᠢᠵᠤ ᠭᠡᠷᠴᠢᠯᠠᠬᠦ ᠳ᠋ᠤᠨᠢ << ᠲᠠ ᠠᠨᠳᠠᠭᠤᠷᠠᠨ᠂ ᠨᠢᠭᠦᠯ ᠬᠤᠷᠢᠶᠠᠵᠤ ᠪᠠᠢᠨᠠ>> ᠭᠡᠳ ᠬᠡᠪ ᠨᠢᠭᠡ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠵᠠᠢ᠃
ᠬᠤᠯᠠᠭᠠᠢᠴᠢ ᠬᠥᠮᠥᠨ ᠬᠤᠰᠢᠭᠤ ᠨᠤᠲᠤᠭᠢᠶᠠᠨ ᠬᠡᠯᠡᠪᠡᠯ ᠤ᠌ᠭ ᠬᠣᠰᠢᠭᠤ ᠨᠤᠲᠤᠭ ᠨᠢ ᠴᠢᠷᠦᠭᠳᠡᠵᠦ ᠲᠦᠯᠦᠪᠦᠷᠢ ᠲᠦᠯᠦᠵᠦ᠂ ᠣᠯᠠᠨᠳᠤ ᠵᠣᠪᠠᠯᠠᠩ ᠲᠠᠷᠢᠭᠠᠳ ᠵᠢᠭᠰᠢᠭᠳᠡᠳᠡᠭ ᠪᠤᠯᠬᠤᠷ ᠰᠢᠯᠢᠶᠢᠨ ᠰᠠᠢᠨ ᠡᠷᠡ ᠪᠠᠷᠢᠭ᠍ᠳᠠᠬᠤᠳᠠᠭᠠᠨ ᠨᠡᠷᠡ ᠤᠰᠤ ᠨᠤᠲᠤᠭ ᠬᠣᠰᠢᠭᠤᠪᠠᠨ ᠬᠡᠯᠡᠬᠦ ᠦᠭᠡᠢᠶᠢ ᠬᠢᠴᠢᠶᠡᠳᠡᠭ᠃
ᠲᠡᠮᠦᠷ ᠡᠷᠡ ᠵᠢᠭᠠᠵᠤ ᠡᠷᠡᠭᠦᠦ ᠰᠢᠭᠦᠯᠲᠡᠶᠢ ᠰᠢᠳᠦ ᠵᠠᠭᠤᠨ ᠳᠠᠪᠠᠵᠤ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ ᠪᠤᠯᠪᠠᠴᠤ ᠠᠳᠤᠭᠤ ᠬᠦᠭᠡᠭᠡᠭᠰᠡᠨ ᠬᠡᠷᠡᠭ ᠨᠢ ᠳᠠᠩᠴᠢ ᠢᠯᠡ ᠪᠤᠯᠬᠤᠷ ᠰᠢᠷᠢᠯᠡᠭᠳᠡᠵᠦ ᠵᠢᠯ ᠰᠢᠬᠠᠮ ᠪᠣᠯᠣᠭᠠᠳ ᠬᠣᠶᠠᠷ ᠬᠣᠨᠣᠭᠤᠨ ᠡᠮᠦᠨᠡ ᠣᠷᠭᠣᠵᠤ ᠪᠥᠮᠪᠥᠷᠢᠭᠰᠡᠭᠡᠷ ᠤᠷᠢᠳᠤ ᠰᠦᠨᠢ ᠡᠨᠳᠡ ᠢᠷᠡᠵᠠᠢ᠃
ᠲᠡᠮᠦᠷ ᠬᠡᠳᠦᠢ ᠴᠢᠳᠠᠯ ᠲᠠᠢ ᠪᠣᠯᠪᠠᠴᠤ᠂ ᠪᠡᠶᠡ ᠳ᠋ᠤᠨᠢ ᠪᠠᠷᠢᠯᠳᠤᠵᠤ ᠬᠠᠲᠠᠭᠰᠠᠨ ᠰᠢᠷᠢ᠂ ᠥᠯ ᠬᠣᠭᠣᠯᠠ ᠦᠭᠡᠢ ᠠᠮᠢ ᠲᠠᠯᠪᠢᠭ᠍ᠰᠠᠨ ᠲᠡᠮᠡᠴᠡᠯ ᠬᠠᠮᠤᠭ ᠬᠦᠴᠦᠶᠢ ᠨᠢ ᠰᠢᠪᠬᠠᠵᠤ᠂ ᠤᠬᠠᠭᠠᠨ ᠪᠤᠳᠣᠯ ᠨᠢ ᠣᠢᠮᠣᠷᠠᠵᠤ ᠲᠤᠢᠯᠳᠠᠭᠰᠠᠨ ᠦᠶᠡᠳᠡᠭᠡᠨ ᠬᠣᠩᠭᠣᠷ ᠲᠠᠢ ᠲᠠᠭᠠᠷᠠᠯᠳᠤᠵᠠᠢ᠃
ᠬᠦᠦ ᠦᠨᠢᠶᠡᠪᠡᠨ ᠲᠠᠭᠤᠭᠠᠳ ᠭᠡᠷᠲᠡᠬᠡᠨ ᠣᠢᠷᠠᠳᠤᠵᠤ ᠣᠴᠢᠬᠤᠳᠤ ᠠᠳᠤᠭᠤ ᠮᠠᠨᠠᠭᠠᠳ ᠤᠷᠭᠠᠪᠠᠨ ᠴᠢᠷᠦᠨ ᠭᠡᠯᠳᠦᠷᠢᠭᠰᠡᠭᠡᠷ ᠭᠡᠷᠦᠨ ᠵᠦᠭ ᠶᠠᠪᠤᠵᠤ ᠪᠠᠢᠭ᠍ᠰᠠᠨ ᠭᠠᠯᠰᠠᠩ ᠲᠠᠢ ᠠᠭᠤᠯᠵᠠᠪᠠ᠃
– ᠬᠣᠩᠭᠣᠷ ᠬᠦᠦ ᠰᠠᠢᠨ ᠬᠣᠨᠤᠪᠠ ᠦᠦ？
ᠬᠣᠩᠭᠣᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠲᠡᠷᠭᠡᠲᠡᠭᠦᠷ ᠨᠢ ᠥᠩᠭᠡᠷᠡᠪᠡ᠃ ᠵᠢᠯᠠᠭᠠᠨᠳᠤ ᠪᠠᠢᠭᠠ ᠬᠥᠮᠥᠨᠳᠦ ᠶᠠᠮᠠᠷ ᠠᠷᠭᠠᠪᠠᠷ ᠬᠡᠨᠳᠦ ᠴᠤ᠌ ᠮᠡᠳᠡᠭᠳᠡᠯ ᠦᠭᠡᠢ ᠲᠤᠰᠠ ᠬᠦᠷᠭᠡᠬᠦ ᠪᠢᠯᠡ ᠭᠡᠬᠦᠠᠴᠠ ᠥᠭᠡᠷᠡ ᠪᠣᠳᠣᠯ ᠪᠠᠢᠭᠠ ᠦᠭᠡᠢ ᠪᠤᠯᠬᠤᠷ ᠭᠠᠯᠰᠠᠩ ᠲᠠᠢ ᠶᠠᠷᠢᠶᠠ ᠳᠡᠯᠭᠡᠬᠦ ᠵᠠᠪ ᠴᠤ᠌᠂ ᠬᠦᠰᠡᠯ ᠴᠤ᠌ ᠦᠭᠡᠢ ᠪᠠᠢᠵᠠᠢ᠃
– ᠶᠠᠭᠤᠨᠳᠤ ᠳᠠᠭᠤᠪᠠᠨ ᠬᠤᠷᠢᠶᠠᠴᠢᠬᠠᠪᠠ？ ᠠᠬᠠᠡᠴᠡ ᠭᠠᠪᠠᠭ ᠬᠥᠷᠳᠡᠭᠡ ᠦᠦ？ ᠭᠡᠵᠦ ᠭᠠᠯᠰᠠᠩ ᠠᠰᠠᠭᠤᠭᠠᠳ ᠢᠨᠢᠶᠡᠪᠡ᠃
ᠭᠠᠯᠰᠠᠩᠢ ᠭᠡᠷᠲᠡᠬᠡᠨ ᠣᠷᠣᠬᠣ᠌ᠳᠤ ᠳᠤᠯᠮᠠ ᠬᠣᠪᠢᠩᠢᠶᠠᠨ ᠪᠠᠷᠢᠭᠠᠳ ᠦᠨᠢᠶᠡᠳᠡᠭᠡᠨ ᠭᠠᠷᠬᠤ ᠭᠡᠵᠦ ᠪᠠᠢᠪᠠ᠃
– ᠳᠤᠯᠮᠠ ᠴᠢ ᠵᠠᠳᠠᠷᠠᠵᠤ ᠪᠠᠢᠨᠠ ᠰᠢᠦ！
– ᠶᠠᠭᠠᠬᠢᠪ？
– ᠥᠷᠭᠦᠯᠵᠢ ᠠᠬᠠᠪᠠᠷ ᠡᠷᠦᠬᠡ ᠲᠠᠲᠠᠭᠤᠯᠵᠤ ᠪᠠᠢᠬᠤ ᠶᠤᠮ᠃ ᠢᠯᠵᠢᠷᠠᠲᠠᠯᠠ ᠤᠨᠳᠠᠭᠠᠳ ᠪᠤᠶᠠᠨ ᠲᠠᠢ ᠬᠥᠮᠥᠨᠢ ᠵᠠᠷᠤᠵᠤ ᠪᠠᠢᠵᠤ ᠵᠠᠶᠠᠭᠠ ᠪᠤᠶᠠᠨᠢᠶᠠᠨ ᠭᠦᠪᠢᠴᠢᠬᠡᠨᠡ ᠰᠢᠦ ᠵᠤᠯᠢᠭ᠋ ᠮᠢᠨᠢ᠃ ᠴᠢ ᠪᠤᠶᠠᠨᠢ ᠨᠢ ᠳᠠᠭᠠᠭᠠᠬᠤ ᠦᠭᠡᠢ ᠰᠢᠦ᠃
– ᠭᠦᠪᠢᠴᠢᠬᠡᠨᠡ ᠪᠠᠢᠬᠠ ᠭᠡᠵᠦ ᠠᠶᠤᠬᠤ ᠵᠠᠶᠠᠭᠠ ᠪᠤᠶᠠᠨ ᠨᠠᠳᠠ ᠪᠠᠢᠬᠤ ᠦᠭᠡᠢ ᠭᠡᠵᠦ ᠳᠤᠯᠮᠠ ᠭᠡᠭᠵᠢᠬᠦᠨ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠡᠳ ᠬᠠᠭᠠᠯᠭᠠᠪᠠᠨ ᠲᠠᠰᠬᠢᠳᠡᠯᠡ ᠬᠠᠶᠠᠭᠠᠳ ᠭᠠᠷᠤᠯᠠ᠃
– ᠲᠡᠨᠡᠭ ᠬᠢᠴᠢᠢ ᠭᠡᠵᠦ ᠭᠠᠯᠰᠠᠩ ᠬᠤᠢᠨᠠᠡᠴᠡ ᠨᠢ ᠬᠠᠰᠬᠢᠷᠤᠭᠠᠳ ᠪᠠᠷᠢᠵᠤ ᠢᠷᠡᠭᠰᠡᠨ ᠴᠠᠷᠳᠠᠮᠠᠯ ᠴᠤᠪᠠᠪᠠᠨ ᠣᠷᠤ ᠤᠷᠤᠭᠤᠪᠠᠨ ᠠᠭᠤᠷ ᠲᠠᠢ ᠴᠢᠯᠠᠭᠤᠳᠠᠪᠠ᠃ ᠬᠣᠩᠭᠣᠷ ᠦᠨᠢᠶᠡ ᠰᠠᠭᠠᠬᠤ᠂ ᠤᠨᠠᠭᠠ ᠪᠠᠷᠢᠬᠤᠶᠢ ᠳᠠᠯᠢᠮᠳᠠᠭᠤᠯᠤᠨ ᠠᠪᠤᠶᠢᠨᠢᠶᠡᠨ ᠬᠤᠷᠴᠠ ᠬᠢᠳᠤᠭᠠ᠂ ᠣᠳᠣᠨᠴᠤᠤ ᠴᠤᠪᠠ᠂ ᠬᠠᠵᠠᠭᠠᠷ᠂ ᠭᠦᠵᠡᠭᠡᠨᠦ ᠪᠤᠯᠤᠩ ᠲᠤᠰᠣ᠌ ᠵᠡᠷᠭᠡ ᠶᠠᠭᠤᠮᠠ ᠴᠤᠭᠯᠠᠭᠤᠯᠤᠨ ᠭᠡᠷᠠᠴᠠᠪᠠᠨ ᠨᠡᠯᠢᠶᠡᠳ ᠵᠠᠢᠲᠠᠢ ᠭᠠᠵᠠᠷ ᠨᠢᠭᠤᠵᠤ ᠠᠮᠵᠢᠪᠠ᠃ ᠢᠩᠬᠢᠭᠡᠳ ᠰᠣᠪᠠᠢ ᠠᠳᠤᠭᠤ ᠭᠡᠯᠢᠬᠦ ᠵᠠᠮᠳᠠᠭᠠᠨ ᠶᠠᠭᠤᠮᠠᠪᠠᠨ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠢᠳᠠᠯᠠ ᠬᠣᠨᠢᠨᠤ ᠬᠣᠢᠨᠠᠡᠴᠡ ᠳᠠᠭᠠᠵᠦ ᠶᠠᠪᠤᠭᠰᠠᠨ ᠳᠤᠯᠮᠠ ᠲᠠᠢ ᠲᠠᠭᠠᠷᠢᠯᠳᠤᠪᠠ᠃
– ᠢᠨᠠᠳᠤᠬᠢ ᠰᠢᠭᠣᠳᠠᠢ ᠲᠠᠢ ᠴᠢᠨᠢ ᠶᠠᠭᠤ ᠪᠤᠢ？ ᠭᠡᠵᠦ ᠳᠤᠯᠮᠠᠶᠢᠨ ᠠᠰᠠᠭᠤᠬᠤᠳᠤ ᠬᠦᠦ ᠬᠦᠮᠦᠬᠡᠢᠪᠡᠨ ᠵᠠᠭᠤᠨ᠂ ᠲᠠᠰᠢᠭᠤᠷᠢᠶᠠᠷᠢᠶᠠᠨ << ᠴᠢᠮᠡᠭᠡ ᠦᠭᠡᠢ >> ᠭᠡᠵᠦ ᠳᠣᠬᠢᠶᠠ ᠥᠭᠭᠦᠭᠡᠳ ᠤᠢᠷᠠᠲᠤᠨ ᠣᠴᠢᠪᠠ᠃
– ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠ ᠲᠠᠢ！
– ᠶᠠᠭᠤ？ ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠ ᠲᠠᠢ ᠭᠡᠨᠡ ᠡ ᠭᠡᠳ ᠳᠤᠯᠮᠠ ᠲᠠᠴᠢᠬᠢᠨᠠᠲᠠᠯᠠ ᠢᠨᠢᠶᠡᠬᠦ ᠵᠠᠭᠤᠷᠠ ᠶᠠᠭᠤᠮᠠᠶᠢ ᠨᠢ ᠠᠵᠢᠭ᠍ᠯᠠᠨ ᠬᠠᠷᠠᠭᠰᠠᠨᠢᠶᠠᠨ᠂ << ᠴᠢ ᠬᠡᠭᠡᠷᠡ ᠡᠷᠬᠡᠯᠡᠬᠦ ᠭᠡᠵᠦ ᠶᠠᠪᠤᠭᠠ ᠶᠤᠮ ᠦᠦ？>> ᠭᠡᠵᠦ ᠠᠰᠠᠭᠤᠪᠠ᠃
– ᠡᠭᠡᠴᠢ ᠡ᠂ ᠬᠡᠨᠳᠦ ᠴᠤ᠌ ᠪᠢᠳᠡᠬᠡᠢ ᠬᠡᠯᠡᠭᠡᠷᠡᠢ᠃
– ᠬᠡᠯᠡᠬᠦ ᠦᠭᠡᠢ᠃
ᠰᠤᠪᠠᠢ ᠠᠳᠤᠭᠤᠪᠠᠨ ᠪᠡᠯᠴᠢᠭᠡᠷᠲᠦ ᠭᠠᠷᠭᠠᠵᠤ ᠣᠷᠬᠢᠭᠠᠳ ᠪᠣᠴᠠᠬᠣ᠌ ᠵᠠᠮᠳᠠᠭᠠᠨ ᠲᠡᠮᠦᠷ ᠳᠡᠭᠡᠷᠡ ᠣᠴᠢᠪᠠ᠃ ᠭᠡᠳᠡᠯᠡ ᠬᠠᠭᠤᠴᠢᠨ ᠪᠠᠢᠷᠢᠨᠳᠠᠭᠠᠨ ᠠᠯᠠᠭᠠ ᠪᠠᠢᠪᠠ᠃
– ᠠᠬᠠ ᠡ᠂ ᠲᠠ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠶᠠᠷᠬᠠᠨ ᠳᠠᠭᠤᠳᠠᠪᠠ᠃ ᠬᠠᠵᠠᠭᠤ ᠲᠠᠯᠠᠶᠢᠨ ᠡᠷᠭᠢᠠᠴᠠ << ᠪᠢ ᠡᠨᠳᠡ ᠪᠠᠢᠨᠠ᠂ ᠬᠦᠷᠦᠭᠡᠳ ᠢᠷᠡ>> ᠭᠡᠵᠦ ᠳᠠᠭᠤᠳᠠᠪᠠ᠃ ᠬᠣᠩᠭᠣᠷ ᠬᠤᠷᠴᠠ ᠬᠢᠳᠤᠭᠠᠪᠠᠷ ᠤᠳᠠᠭᠠᠨ ᠨᠣᠴᠣᠯᠳᠤᠵᠤ ᠪᠠᠢᠵᠤ ᠰᠢᠷᠢᠯᠡᠭᠰᠡᠨ ᠰᠢᠷᠢᠶᠢ ᠰᠠᠯᠭᠠᠪᠠ᠃ ᠲᠡᠷᠡ ᠬᠥᠮᠥᠨ ᠳᠡᠪᠡᠯ ᠬᠣᠪᠴᠠᠰᠤ ᠲᠠᠢ ᠪᠣᠯᠪᠠᠴᠤ᠂ ᠳᠡᠭᠡᠬᠦᠷ ᠨᠢ ᠪᠡᠯᠴᠢᠵᠦ ᠪᠠᠢᠭᠠ ᠪᠦᠭᠡᠰᠦᠶᠢ ᠬᠠᠷᠠᠬᠤ ᠠᠷᠭᠠ ᠦᠭᠡᠢ ᠠᠵᠠᠢ᠃
– ᠠᠬᠠ ᠡ᠂ ᠶᠠᠮᠠᠷ ᠶᠡᠬᠡ ᠪᠦᠭᠡᠰᠦ ᠪᠤᠢ ᠭᠡᠵᠤ ᠬᠣᠩᠭᠣᠷᠤᠨ ᠠᠰᠠᠭᠤᠬᠤᠳᠤ ᠪᠣᠰᠬᠤ ᠭᠡᠳ ᠴᠢᠳᠠᠯ ᠦᠭᠡᠢ ᠪᠣᠴᠠᠵᠤ ᠬᠡᠪᠲᠡᠭᠰᠡᠨ ᠲᠡᠮᠦᠷ << ᠲᠠᠢᠰᠢᠷᠢ ᠮᠢᠨᠢ >> ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠨᠢᠳᠦᠪᠡᠨ ᠠᠨᠢᠵᠤ ᠠᠯᠭᠤᠷ ᠳᠦᠷᠪᠡᠨ ᠮᠥᠴᠢᠪᠡᠨ ᠬᠥᠳᠡᠯᠭᠡᠵᠦ ᠡᠬᠢᠯᠡᠪᠡ᠃
– ᠠᠬᠠᠶᠢᠨ ᠬᠢᠨᠢ ᠲᠣᠯᠣᠭᠠᠢ ᠡᠷᠭᠢᠵᠦ ᠪᠠᠢᠨᠠ ᠭᠡᠵᠦ ᠰᠢᠪᠡᠭᠡᠨᠡᠪᠡ᠃
ᠪᠡᠶᠡᠪᠡᠨ ᠡᠢᠮᠦ ᠬᠠᠲᠠᠭᠤ ᠰᠢᠷᠢᠨᠳᠦ ᠪᠣᠭᠣᠯᠭᠠᠵᠤ ᠥᠳᠠᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠡᠳᠦᠷ ᠬᠤᠯᠠ ᠭᠠᠵᠠᠷ ᠭᠠᠵᠠᠷ ᠶᠠᠪᠤᠵᠤ ᠢᠷᠡᠭᠰᠡᠨ ᠡᠨᠡ ᠬᠦᠮᠦᠨᠢ ᠬᠠᠷᠠᠬᠤ ᠲᠣᠰᠤᠮ ᠬᠣᠩᠭᠣᠷᠤᠨ ᠰᠡᠳᠬᠢᠯ ᠬᠦᠭᠡᠷᠦᠨ᠂ ᠪᠣᠭᠣᠨᠢ ᠠᠮᠢᠳᠤᠷᠠᠯᠳᠠᠭᠠᠨ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ << ᠭᠡᠷᠲᠦ ᠣᠷᠣᠵᠤ᠂ ᠭᠡᠭᠡᠨᠳᠦ ᠮᠥᠷᠭᠦᠳᠡᠭ ᠦᠭᠡᠢ >> ᠰᠠᠢᠨ ᠡᠷᠡᠶᠢᠨ ᠲᠤᠬᠠᠢ ᠶᠠᠷᠢᠶᠠᠨᠤᠭᠤᠳ ᠰᠡᠳᠬᠢᠯ ᠳ᠋ᠤᠨᠢ ᠬᠦᠪᠴᠦ ᠪᠠᠢᠨᠠ᠃
– ᠲᠠ ᠰᠢᠯᠢᠶᠢᠨ ᠰᠠᠢᠨ ᠡᠷᠡ ᠦᠦ？ ᠭᠡᠵᠤ ᠬᠣᠩᠭᠣᠷ ᠲᠠᠪᠴᠢᠯ ᠦᠭᠡᠢ ᠠᠰᠠᠭᠤᠪᠠ᠂ ᠲᠡᠮᠦᠷ ᠨᠢᠳᠦᠪᠡᠨ ᠠᠯᠭᠤᠷ ᠨᠡᠬᠡᠭᠡᠵᠦ᠂ ᠬᠦᠦᠶᠢ ᠤᠳᠠᠳᠠᠯᠠ ᠰᠢᠷᠳᠡᠵᠦ ᠪᠠᠢᠭ᠍ᠰᠠᠨᠢᠶᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠪᠠ᠃
– ᠴᠢ ᠵᠠᠰᠠᠭᠲᠤ ᠬᠠᠨᠤ ᠴᠠᠬᠢᠭᠣᠷ ᠲᠡᠮᠦᠷ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠦᠦ？
ᠥᠩᠭᠡᠷᠡᠭᠰᠡᠨ ᠵᠢᠯ ᠲᠠᠮᠠᠭᠠᠶᠢᠨ ᠵᠢᠰᠢᠶᠠᠨ ᠳᠡᠭᠡᠷᠡ ᠬᠠᠯᠬᠠ ᠳᠠᠶᠠᠭᠠᠷ ᠴᠤᠤ ᠭᠠᠷᠤᠭᠰᠠᠨ ᠵᠠᠰᠠᠭᠲᠤ ᠬᠠᠨᠤ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠭᠴᠢ ᠰᠠᠢᠨ ᠡᠷᠡ ᠪᠠᠷᠢᠭ᠍ᠳᠠᠭᠠᠳ ᠪᠠᠢᠴᠠᠭᠠᠭᠳᠠᠵᠤ ᠪᠠᠢᠨᠠ ᠭᠡᠰᠡᠨ ᠶᠠᠷᠢᠶᠠᠶᠢ ᠰᠣᠨᠣᠰᠴᠤ ᠪᠢᠯᠡ᠃
– ᠰᠣᠨᠤᠰᠤᠭᠰᠠᠨ᠂ ᠠᠬᠠ ᠡ᠃ ᠲᠠ ᠴᠠᠬᠢᠭᠣᠷ ᠲᠡᠮᠦᠷ ᠦᠦ？
– ᠲᠡᠢᠮᠦ᠃ ᠪᠢ ᠴᠠᠬᠢᠭᠤᠷ ᠲᠡᠮᠦᠷ᠃
ᠲᠦᠮᠡᠨᠳᠦ ᠠᠯᠳᠠᠷᠰᠢᠭ᠍ᠰᠠᠨ ᠮᠣᠨᠳᠠᠭ ᠡᠷᠡᠳᠦ ᠲᠤᠰᠠ ᠪᠣᠯᠤᠭᠠᠳ ᠵᠡᠷᠭᠡᠴᠡᠨ ᠶᠠᠷᠢᠵᠤ ᠪᠠᠢᠭᠠᠳᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠬᠦᠦ ᠨᠢᠳᠦᠪᠠᠨ ᠳᠦᠷᠯᠡᠢᠯᠭᠡᠨ ᠮᠠᠷᠰᠠᠢᠨ ᠢᠨᠢᠶᠡᠪᠡ᠃
– ᠳᠡᠭᠦᠦᠶᠢᠨ ᠨᠡᠷᠡ ᠬᠡᠨ ᠪᠢᠯᠡ？
– ᠬᠣᠩᠭᠣᠷ᠃ ᠯᠤᠤ ᠭᠦᠩᠦᠨ ᠪᠠᠶᠠᠨ ᠢᠳᠡᠭᠡᠯᠲᠥ᠍ᠶᠢᠨ ᠬᠦᠦ ᠭᠡᠵᠦ ᠨᠠᠷᠢᠬᠠᠨ ᠲᠠᠭᠤᠪᠠᠷ ᠴᠣᠪᠣᠭᠣ᠌ ᠭᠡᠭᠴᠢ ᠨᠢ ᠬᠠᠷᠢᠭᠤᠯᠪᠠ᠃
ᠤᠳᠠᠯ ᠦᠭᠡᠢ ᠲᠡᠮᠦᠷ ᠪᠣᠰᠴᠣ᠌ ᠲᠡᠪᠡᠯ ᠬᠣᠪᠴᠠᠰᠦᠪᠠᠨ ᠲᠠᠢᠯᠤᠨ᠂ ᠵᠠᠷᠢᠮᠢ ᠨᠢ ᠭᠠᠵᠠᠷ ᠪᠣᠯᠠᠵᠤ᠂ ᠵᠠᠷᠢᠮᠢ ᠨᠢ ᠭᠦᠪᠢᠵᠦ ᠰᠡᠭᠰᠦᠷᠦᠨ ᠡᠮᠦᠰᠪᠡ᠃ ᠭᠠᠳᠠᠭᠤᠷ ᠨᠢ ᠬᠣᠩᠭᠣᠷᠤᠨ ᠠᠪᠴᠢᠷᠠᠭᠰᠠᠨ ᠣᠳᠣᠨᠴᠤᠤ ᠴᠤᠪᠠᠶᠢ ᠡᠮᠦᠰᠦᠭᠡᠳ ᠪᠦᠰᠡᠯᠡᠪᠡ᠃
ᠡᠨᠡ ᠭᠠᠢᠬᠠᠮᠰᠢᠭ᠍ᠲᠤ ᠡᠷᠡᠶᠢᠨ ᠬᠥᠳᠡᠯᠭᠡᠭᠡᠨ ᠪᠦᠬᠦᠨ ᠬᠦᠦᠳᠦ ᠶᠡᠷᠦ ᠪᠤᠰᠤᠶᠢᠨ ᠶᠠᠭᠤᠮᠠ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃ ᠢᠯᠠᠩᠭᠤᠶᠠ ᠭᠦᠵᠡᠭᠡᠨᠦ ᠪᠣᠯᠣᠩ ᠲᠣᠰᠣ᠌ᠶᠢ ᠬᠡᠳᠦᠬᠡᠨ ᠡᠮᠬᠦᠭᠡᠳ ᠠᠯᠠᠭᠠ ᠪᠣᠯᠭᠠᠵᠤ᠂ ᠬᠠᠨᠴᠤᠢᠪᠠᠷᠢᠶᠠᠨ ᠠᠮᠠᠪᠠᠨ ᠱᠣᠳᠣᠷᠣᠨ ᠠᠷᠴᠢᠭᠠᠳ ᠬᠣᠭᠣᠰᠣᠨ ᠭᠦᠵᠡᠭᠡᠶᠢ ᠨᠢ ᠲᠡᠷᠡ ᠬᠣᠯᠠ ᠰᠢᠳᠡᠵᠦ ᠣᠷᠬᠢᠬᠤ ᠨᠢ ᠬᠡᠨ ᠴᠤ᠌ ᠴᠢᠳᠠᠮᠠ ᠦᠭᠡᠢ ᠭᠠᠢᠬᠠᠮᠰᠢᠭ᠍ᠲᠣ᠌ ᠶᠠᠭᠤᠮᠠ ᠮᠡᠲᠦ ᠪᠣᠳᠣᠭᠳᠠᠪᠠ᠃
– ᠵᠠ ᠳᠡᠭᠦᠦ ᠮᠢᠨᠢ ᠣᠷᠲᠣ᠌ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭᠠᠭᠠᠷᠠᠢ！ ᠠᠬᠠ ᠨᠢ ᠡᠷᠡ ᠬᠥᠮᠥᠨᠦ ᠠᠴᠢᠶᠢ ᠬᠠᠷᠢᠭᠤᠯᠵᠤ ᠴᠢᠳᠠᠨᠠ᠃ ᠵᠠᠮᠤᠨ ᠬᠦᠵᠦᠭᠦᠦ ᠤᠷᠲᠤ᠂ ᠵᠠᠭᠠᠨᠤ ᠬᠦᠵᠦᠭᠦᠦ ᠪᠤᠭᠤᠨᠢ ᠪᠣᠯᠬᠤᠷ ᠠᠭᠤᠯᠵᠠᠨᠠ ᠳᠠ᠃ ᠣᠳᠣ᠌ ᠳᠡᠭᠦᠦ ᠮᠢᠨᠢ ᠬᠠᠷᠢ ᠭᠡᠵᠦ ᠲᠡᠮᠦᠷ ᠬᠡᠯᠡᠪᠡ᠃
ᠬᠣᠩᠭᠣᠷ᠂ ᠬᠢᠳᠤᠭᠠᠪᠠᠨ ᠠᠪᠴᠤ ᠮᠣᠷᠳᠠᠭᠠᠳ ᠭᠡᠷᠦᠨ ᠵᠦᠭ ᠰᠠᠵᠢᠯᠠᠨ ᠶᠠᠪᠤᠵᠤ ᠪᠠᠢᠬᠤᠳᠠᠭᠠᠨ << ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠡᠲᠠᠢ >> ᠭᠡᠵᠤ ᠲᠠᠪᠳᠠᠨ᠂ ᠲᠠᠬᠢᠨ ᠲᠠᠬᠢᠨ ᠡᠷᠭᠢᠵᠦ ᠬᠠᠷᠠᠭᠰᠠᠭᠠᠷ ᠢᠷᠡᠪᠡᠯ ᠵᠡᠯᠡ ᠤᠶᠠᠭᠠᠨ ᠳᠡᠭᠡᠷᠡ ᠨᠢ ᠥᠯᠦ ᠲᠠᠨᠢᠬᠤ ᠬᠣᠶᠠᠷ ᠮᠣᠷᠢ ᠪᠠᠢᠯᠠ᠃
<< ᠮᠠᠨᠳᠤ ᠬᠡᠨ ᠢᠷᠡᠭᠡ ᠶᠤᠮ ᠪᠤᠯ？ >> ᠭᠡᠵᠦ ᠪᠤᠳᠣᠭᠠᠳ ᠭᠡᠷᠲᠡᠬᠡᠨ ᠣᠷᠤᠪᠠᠯ ᠢᠵᠢᠯᠢᠬᠡᠨ ᠬᠠᠭᠤᠴᠢᠨ ᠰᠢᠷᠠ ᠴᠢᠰᠴᠠᠤ ᠬᠠᠨᠳᠠᠭᠠᠵᠠ ᠲᠠᠢ ᠬᠣᠶᠠᠷ ᠬᠥᠮᠥᠨ ᠳᠣᠯᠤ ᠬᠤᠯᠤ ᠲᠠᠢ ᠠᠢᠷᠠᠭ ᠤᠤᠭᠤᠨ ᠠᠪᠤ ᠲᠠᠢ ᠨᠢ ᠶᠠᠷᠢᠵᠤ ᠪᠠᠢᠪᠠ᠃
– ᠢᠳᠡᠭᠡᠯᠲᠥ᠍ ᠭᠣᠸᠠᠢ ᠲᠠ ᠰᠢᠭᠦᠭ᠌ᠳᠠᠵᠦ ᠪᠠᠢᠬᠤᠶᠢ ᠨᠢ ᠬᠠᠷᠠᠭᠰᠠᠨ ᠪᠤᠯ ᠶᠠᠭᠠᠬᠢᠨᠠ᠃ ᠬᠣᠩᠭᠣᠨᠤ ᠬᠢᠨᠢ ᠴᠢᠰᠤ ᠨᠢᠭᠤᠷ ᠤᠷᠤᠭᠤ ᠦᠰᠦᠷᠦᠭᠡᠳ ᠪᠠᠢᠬᠤᠳᠤ ᠰᠢᠳᠦ ᠨᠢ ᠬᠢᠬᠤᠳᠤᠨᠠᠬᠤᠠᠴᠠ ᠥᠭᠡᠷᠡ ᠴᠢᠮᠡᠭᠡ ᠭᠠᠷᠳᠠᠭ ᠦᠭᠡᠢ ᠨᠤᠬᠠᠢ ᠳᠠ᠃ ᠴᠠᠬᠢᠭᠤᠷ ᠲᠡᠮᠦᠷ ᠴᠤ᠌ ᠡᠷᠡᠶᠢᠨ ᠬᠤᠪᠢᠳᠤ ᠡᠷᠡ ᠡ᠃ ᠪᠠᠷᠢᠵᠤ ᠠᠪᠤᠭᠠᠳ ᠠᠬᠠ ᠨᠢ ᠮᠥᠴᠢ ᠮᠥᠴᠢᠪᠡᠷ ᠨᠢ ᠵᠢᠬᠢᠷᠢᠭᠯᠡᠵᠦ ᠪᠠᠢᠭᠠᠳ ᠮᠥᠯᠵᠢᠵᠦ ᠣᠷᠬᠢᠨᠠ ᠳᠠ ᠭᠡᠵᠦ ᠨᠢᠭᠤᠷ ᠨᠢ ᠪᠠᠳᠠᠭᠠᠨᠠᠳᠤ ᠢᠳᠡᠭᠳᠡᠵᠦ ᠨᠥᠬᠡ ᠪᠣᠯᠣᠭᠰᠠᠨ ᠥᠷᠭᠡᠨ ᠴᠡᠭᠡᠵᠢ ᠲᠠᠢ ᠲᠣᠮᠤ ᠬᠥᠮᠥᠨ ᠬᠡᠯᠡᠭᠡᠳ ᠫᠠᠷᠴᠢᠬᠢᠨᠠᠨ ᠢᠨᠢᠶᠡᠬᠦ ᠳ᠋ᠤᠨᠢ ᠶᠡᠬᠡ ᠭᠡᠷ ᠲᠣᠷᠭᠢᠬᠤ ᠰᠢᠭ᠋ ᠪᠤᠯᠪᠠ᠃
ᠡᠨᠡ ᠬᠦᠮᠦᠨᠢ ᠪᠠᠳᠠᠷᠴᠢ ᠭᠡᠳᠡᠭ᠃ ᠠᠷᠪᠠᠨ ᠳᠣᠯᠣᠭᠠᠳ ᠨᠠᠰᠤᠨᠠᠴᠠᠪᠠᠨ ᠯᠤᠤ ᠭᠦᠩᠦᠨ ᠲᠠᠮᠠᠭᠠᠶᠢᠨ ᠲᠠᠬᠠᠷ ᠬᠢᠭᠰᠡᠨ ᠪᠦᠭᠡᠳ ᠣᠳᠣ᠌ ᠭᠤᠴᠢ ᠬᠦᠷᠴᠠᠢ᠃ ᠬᠡᠷᠡᠭᠲᠡᠨᠳᠦ ᠬᠠᠲᠠᠭᠤ ᠬᠠᠷᠬᠢᠰ᠂ ᠪᠠᠰᠠ ᠲᠡᠭᠡᠭᠡᠳ ᠴᠢᠳᠠᠯ ᠭᠦᠴᠦ ᠶᠡᠬᠡᠲᠠᠢ ᠳᠣᠯᠣᠭᠠᠨ ᠬᠣᠰᠢᠭᠤᠨᠤ ᠵᠠᠭᠠᠨ ᠴᠣᠯᠠ ᠲᠠᠢ ᠬᠥᠮᠥᠨ᠃ ᠲᠠᠬᠠᠷ ᠬᠢᠭᠰᠡᠨᠠᠴᠠ ᠬᠤᠢᠰᠢ ᠬᠡᠭᠡᠯᠢ ᠬᠠᠬᠤᠤᠯᠢ ᠠᠪᠴᠤ ᠣᠪᠣᠭᠠ ᠬᠥᠷᠥᠩᠭᠡ ᠲᠠᠢ ᠪᠣᠯᠣᠭᠠᠳ ᠰᠡᠭᠦᠯᠦᠨ ᠦᠶᠡᠳᠦ ᠬᠥᠮᠥᠨᠢ << ᠮᠠᠭᠤ ᠭᠤᠶᠤᠯᠭᠠᠴᠢᠨ >> ᠭᠡᠵᠦ ᠳᠠᠭᠠᠷᠢᠬᠤ ᠨᠢ ᠤᠯᠠᠮ ᠤᠯᠠᠨ ᠪᠣᠯᠵᠤ ᠪᠠᠢᠭᠠ ᠪᠢᠯᠡ᠃
ᠪᠠᠳᠠᠷᠴᠢ ᠥᠩᠭᠡᠷᠡᠭᠰᠡᠨ ᠵᠢᠯ ᠲᠡᠮᠦᠷᠢ ᠤᠰᠤᠨᠳᠦ ᠬᠥᠪᠴᠦ ᠶᠠᠪᠤᠬᠤ ᠳ᠋ᠤᠨᠢ ᠪᠠᠷᠢᠭᠠᠳ ᠲᠠᠮᠠᠭᠠᠨ ᠳᠡᠭᠡᠷᠡ ᠠᠪᠠᠴᠢᠵᠤ ᠥᠪᠡᠷᠢᠶᠡᠨ ᠪᠠᠩᠵᠠᠳᠠᠨ᠂ ᠰᠢᠷᠢᠯᠡᠵᠠᠢ᠃ ᠲᠠᠬᠠᠷ ᠬᠢᠭᠰᠡᠨ ᠦᠶᠡᠳᠡᠭᠡᠨ ᠣᠯᠠᠨ ᠬᠥᠮᠥᠨᠢ ᠰᠢᠷᠢᠯᠡᠭᠰᠡᠨ ᠪᠦᠭᠡᠳ ᠲᠡᠳᠡ ᠨᠠᠷᠡᠴᠡ ᠣᠷᠭᠣᠵᠤ ᠪᠠᠢᠭ᠍ᠰᠠᠨ ᠬᠥᠮᠥᠨ ᠦᠭᠡᠢ᠃ ᠭᠡᠲᠡᠯᠡ ᠴᠠᠬᠢᠭᠤᠷ ᠲᠡᠮᠦᠷ ᠣᠷᠭᠣᠵᠠᠢ᠃ ᠡᠬᠦᠨᠢ ᠪᠣᠳᠣᠬᠣ᠌ ᠲᠣᠰᠤᠮ ᠬᠣᠷᠤᠰᠴᠤ ᠪᠠᠢᠪᠠ᠃
ᠥᠩᠭᠡᠷᠡᠭᠰᠡᠨ ᠵᠢᠯ ᠲᠡᠮᠦᠷᠢ ᠪᠠᠩᠵᠠᠳᠠᠵᠤ ᠪᠠᠢᠬᠤᠳᠠᠭᠠᠨ ᠲᠡᠬᠦᠨᠦ ᠭᠠᠩ ᠵᠣᠷᠢᠭ᠋᠂ ᠳᠡᠰᠪᠦᠷᠢ ᠳ᠋ᠤᠨᠢ ᠪᠠᠬᠠᠷᠬᠠᠵᠤ ᠪᠠᠢᠭ᠍ᠰᠠᠨ᠃ ᠴᠢᠨ᠋ᠸᠠᠶᠢ ᠪᠠᠷᠢᠵᠤ ᠠᠪᠤᠭᠰᠠᠨ ᠬᠦᠮᠦᠨ ᠡᠷᠡ ᠴᠢᠳᠠᠯ ᠳ᠋ᠤᠨᠢ ᠪᠠᠬᠠᠷᠬᠠᠵᠤ ᠪᠠᠢᠭᠠᠳ ᠵᠣᠪᠠᠭᠠᠬᠤ ᠤᠳᠠᠭᠠ ᠪᠠᠢᠳᠠᠭ᠂ ᠲᠡᠮᠦᠷᠢ ᠪᠠᠩᠵᠠᠳᠠᠵᠤ ᠪᠠᠢᠬᠤᠳᠤ ᠪᠠᠳᠠᠷᠴᠢ ᠶᠠᠭ ᠯᠡ ᠲᠡᠢᠮᠦ ᠪᠠᠢᠭ᠍ᠰᠠᠨ᠃ ᠪᠠᠳᠠᠷᠴᠢᠶᠢᠨ ᠬᠣᠷᠢᠨ ᠪᠠᠩᠵᠠᠶᠢ ᠳᠠᠪᠠᠵᠤ ᠪᠠᠢᠭ᠍ᠰᠠᠨ ᠡᠷᠡ ᠦᠭᠡᠢ᠃ ᠭᠡᠲᠡᠯᠡ ᠲᠡᠮᠦᠷᠢ ᠳᠥᠴᠢ ᠪᠠᠩᠵᠠᠳᠠᠭᠠᠳ ᠬᠠᠷᠠᠬᠤᠳᠤ ᠨᠢᠳᠦ ᠨᠢ ᠭᠦᠯᠢᠯᠵᠡᠨ᠂ ᠰᠢᠳᠦ ᠨᠢ ᠲᠠᠴᠢᠬᠢᠨᠠᠵᠤ ᠪᠠᠢᠵᠠᠢ᠃ ᠢᠩᠬᠢᠭᠡᠳ ᠲᠡᠮᠦᠷᠢ ᠭᠢᠨᠳᠠᠨ ᠤᠷᠤᠭᠤ ᠴᠢᠷᠦᠭᠡᠳ ᠪᠠᠢᠬᠤᠳᠠᠭᠠᠨ << ᠪᠣᠵᠠᠭᠠᠢ ᠡᠷᠡ ᠶᠤᠮ ᠳᠠ᠃ ᠮᠠᠷᠭᠠᠰᠢ ᠠᠬᠠ ᠨᠢ ᠳᠡᠭᠦᠦᠪᠡᠨ ᠳᠤᠤᠭᠠᠷᠭᠠᠵᠤ ᠴᠢᠳᠠᠨᠠ >> ᠭᠡᠵᠦ ᠪᠠᠬᠠᠳᠤᠨ ᠬᠡᠯᠡᠵᠠᠢ᠃ ᠮᠠᠷᠭᠠᠰᠢ ᠨᠢ ᠬᠤᠷᠢ ᠴᠣᠬᠢᠭᠠᠳ ᠲᠦᠷ ᠵᠣᠭᠰᠣᠬᠤᠳᠤ ᠲᠡᠮᠦᠷ ᠠᠮᠠᠨᠳᠠᠭᠠᠨ << ᠬᠣᠷᠢ>> ᠭᠡᠳ ᠬᠥᠯᠢᠶᠡᠨ ᠬᠥᠳᠡᠯᠭᠡᠵᠦ ᠬᠡᠪᠲᠡᠷᠢᠪᠡᠨ ᠵᠠᠰᠠᠵᠠᠢ᠃ ᠪᠠᠳᠠᠷᠴᠢ ᠣᠯᠠᠮ ᠬᠤᠷᠤᠰᠴᠤ ᠨᠢᠭᠡ ᠪᠠᠩᠵᠠ ᠬᠤᠭᠤᠯᠤᠭᠰᠠᠨ ᠪᠤᠯᠪᠠᠴᠤ ᠲᠡᠮᠦᠷ ᠪᠡᠬᠢ ᠪᠠᠢᠳᠠᠭᠢᠶᠠᠷᠢᠶᠠᠨ ᠨᠢᠳᠦᠪᠡᠨ ᠭᠦᠯᠢᠢᠯᠭᠡᠨ ᠰᠢᠳᠦᠪᠡᠨ ᠬᠢᠬᠤᠳᠣᠨᠠᠭᠤᠯᠤᠨ ᠬᠠᠪᠢᠷᠴᠦ ᠪᠠᠢᠪᠠ᠃
– ᠴᠢ ᠴᠢᠯᠠᠭᠤ ᠶᠤᠮ ᠦᠦ？ ᠬᠥᠮᠥᠨ ᠶᠤᠮ ᠦᠦ？ ᠭᠡᠵᠦ ᠠᠭᠤᠷᠯᠠᠭᠰᠠᠨ ᠲᠠᠬᠠᠷ ᠠᠰᠠᠭᠤᠬᠤᠳᠤ ᠲᠡᠮᠦᠷ᠄
– ᠵᠠ᠂ ᠪᠢ ᠬᠤᠶᠠᠷ ᠬᠥᠯ ᠲᠠᠢ᠂ ᠬᠤᠬᠢᠮᠠᠢ ᠲᠤᠯᠤᠭᠠᠢ ᠲᠠᠢ ᠬᠥᠮᠥᠨ ᠪᠢᠯᠡ ᠭᠡᠵᠦ ᠶᠤᠵᠤᠯᠠᠨ ᠬᠠᠷᠢᠭᠤᠯᠪᠠ᠃ ᠡᠴᠦᠰ ᠲᠤᠨᠢ ᠲᠡᠮᠦᠷᠢ ᠪᠠᠳᠠᠷᠴᠢ ᠰᠢᠷᠢᠯᠡᠵᠦ ᠪᠠᠢᠬᠤᠳᠤ ᠲᠡᠮᠦᠷ ᠨᠢᠳᠦᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠰᠢᠳᠦᠪᠡᠨ ᠵᠠᠭᠤᠵᠤ ᠪᠠᠢᠭᠠᠳ << ᠣᠷᠭᠣᠨᠠ ᠰᠢᠦ >> ᠭᠡᠬᠦ ᠳ᠋ᠤᠨᠢ ᠪᠠᠳᠠᠷᠴᠢ ᠶᠡᠬᠡᠮᠰᠦᠭᠢᠶᠡᠷ ᠢᠨᠢᠶᠡᠮᠰᠦᠭᠯᠡᠵᠦ᠄
– ᠮᠠᠭᠤ ᠭᠤᠶᠤᠯᠭᠠᠴᠢᠨ ᠴᠢ ᠰᠠᠴᠢ ᠴᠢᠨᠢ ᠬᠦᠷᠪᠡᠯ ᠲᠡᠭᠡᠭᠡᠷᠡᠢ ᠭᠡᠵᠠᠢ᠃
ᠴᠠᠭᠠᠨ ᠰᠠᠷᠠᠶᠢᠨ ᠰᠢᠨᠡᠶᠢᠨ ᠨᠢᠭᠡᠨᠳᠦ ᠪᠠᠳᠠᠷᠴᠢ ᠲᠠᠷᠭᠤᠨ ᠬᠤᠨᠢᠨᠤ ᠭᠤᠶᠠ ᠴᠢᠨᠠᠵᠤ ᠣᠴᠢᠭᠠᠳ ᠲᠣᠮᠤ ᠲᠣᠮᠣ᠌ ᠤᠭᠳᠤᠯᠠᠨ ᠥᠭᠬᠦ ᠳ᠋ᠤᠨᠢ ᠲᠡᠮᠦᠷ ᠰᠢᠷ ᠰᠢᠷ ᠵᠠᠵᠢᠯᠤᠨ ᠢᠳᠡᠬᠦ ᠵᠠᠭᠤᠷᠠ << ᠴᠢ ᠦᠰᠦ᠂ ᠰᠠᠬᠠᠯᠢ ᠮᠢᠨᠢ ᠰᠠᠯᠭᠠᠵᠤ ᠥᠭᠬᠦ ᠦᠭᠡᠢ ᠦᠦ >> ᠭᠡᠬᠦᠳᠦ᠂
– ᠣᠷᠭᠣᠵᠤ ᠭᠠᠷᠤᠭᠠᠳ ᠰᠠᠯᠭᠠᠬᠤ ᠦᠭᠡᠢ ᠦᠦ ᠭᠡᠵᠦ ᠪᠠᠳᠠᠷᠴᠢ ᠲᠠᠪᠠᠯᠠᠵᠠᠢ᠃
ᠭᠡᠲᠡᠯᠡ ᠴᠠᠬᠢᠭᠤᠷ ᠲᠡᠮᠦᠷ ᠣᠷᠭᠣᠵᠠᠢ᠃ ᠡᠨᠡ ᠨᠢ ᠪᠠᠳᠠᠷᠴᠢᠶᠢᠨ ᠨᠡᠷᠡᠶᠢ ᠨᠢᠭᠡᠮᠦᠰᠦᠨ ᠬᠤᠤᠷᠯᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠭᠠᠳ << ᠶᠠᠭᠠᠬᠢᠵᠤ ᠡᠢᠵᠦ ᠪᠠᠢᠭᠠᠳ ᠲᠡᠮᠦᠷᠢ ᠵᠠᠪᠠᠯ ᠪᠠᠷᠢᠵᠤ ᠠᠯᠳᠠᠭᠰᠠᠨ ᠨᠡᠷᠡ ᠪᠡᠨ ᠣᠯᠵᠤ ᠠᠪᠬᠤ᠂ ᠲᠠᠰᠢᠷᠠᠮ ᠳ᠋ᠤᠨᠢ ᠬᠠᠯᠬᠠ ᠳᠠᠶᠠᠭᠠᠷ ᠴᠤᠤᠷᠢᠶᠠᠲᠤᠭᠰᠠᠨ ᠰᠠᠢᠨ ᠡᠷᠡᠶᠢ ᠬᠤᠶᠠᠳᠠᠬᠢ ᠤᠳᠠᠭᠠ ᠪᠡᠨ ᠪᠠᠷᠢᠭ᠍ᠰᠠᠨ ᠠᠯᠳᠠᠷ ᠵᠡᠭᠦᠨᠡ>> ᠭᠡᠵᠦ ᠪᠣᠳᠣᠵᠤ ᠪᠠᠢᠪᠠ᠃
ᠪᠠᠳᠠᠷᠴᠢᠶᠢᠨ ᠳᠣᠣᠷᠠ ᠰᠠᠭᠤᠵᠤ ᠪᠠᠢᠭᠠ ᠨᠠᠮᠬᠠᠨ ᠪᠦᠳᠦᠭᠦᠨ ᠬᠥᠮᠥᠨᠢ ᠳᠠᠮᠳᠢᠨ ᠭᠡᠳᠡᠭ᠃ ᠥᠩᠭᠡᠷᠡᠭᠰᠡᠨ ᠵᠢᠯᠠᠴᠠ ᠡᠬᠢᠯᠡᠨ ᠲᠠᠮᠠᠭᠠᠶᠢᠨ ᠲᠠᠬᠠᠷ ᠬᠢᠵᠦ ᠪᠠᠢᠭᠠ ᠠᠵᠠᠢ᠃
ᠳᠠᠮᠳᠢᠨᠳᠤ ᠲᠡᠮᠦᠷᠢ ᠪᠠᠷᠢᠬᠤ ᠰᠢᠨᠤᠯ ᠪᠠᠢᠭ᠍ᠰᠠᠨ ᠦᠭᠡᠢ᠃ ᠬᠠᠷᠢᠨ ᠭᠡᠮᠨᠡᠭ ᠦᠭᠡᠢ ᠶᠠᠪᠤᠵᠤ ᠪᠠᠢᠭᠠᠳ ᠴᠣᠬᠢᠭᠤᠯᠴᠢᠬᠠᠵᠤ ᠮᠠᠭᠠᠳ ᠭᠡᠵᠦ ᠵᠤᠷᠠᠮᠠ ᠲᠠᠪᠬᠢᠭ᠍ᠰᠠᠨ ᠴᠤ᠌ ᠰᠣᠴᠢᠵᠤ᠂ ᠴᠣᠭᠴᠠᠬᠢ ᠲᠤᠤᠭᠠᠷᠤᠭᠰᠠᠨ ᠴᠤ᠌ ᠰᠠᠷᠪᠠᠯᠵᠠᠨ ᠶᠠᠪᠤᠵᠠᠢ᠃
– ᠮᠢᠨᠤ ᠬᠦᠦ ᠮᠠᠯᠳᠤ ᠶᠠᠪᠤᠵᠤ ᠪᠠᠢᠬᠤᠳᠤ ᠴᠢᠨᠢ ᠭᠠᠭᠴᠠ ᠨᠢᠭᠡ ᠶᠠᠪᠠᠭᠠᠨ᠂ ᠨᠢᠴᠦᠭᠦᠨ ᠬᠥᠮᠥᠨ ᠬᠠᠷᠠᠭᠳᠠᠭᠠ ᠦᠭᠡᠢ ᠪᠢᠵᠠ？ ᠭᠡᠵᠦ ᠢᠳᠡᠭᠡᠯᠲᠥ᠍ ᠬᠥᠥᠬᠦᠷᠦᠨ ᠡᠮᠦᠨᠡ ᠵᠣᠭᠰᠤᠵᠤ ᠪᠠᠢᠭ᠍ᠰᠠᠨ ᠬᠣᠩᠭᠣᠷᠡᠴᠡ ᠠᠰᠠᠭᠤᠪᠠ᠃
– ᠦᠭᠡᠢ᠂ ᠠᠵᠢᠭᠠ ᠦᠭᠡᠢ ᠭᠡᠳ ᠬᠣᠩᠭᠣᠷ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃ ᠬᠣᠩᠭᠣᠷᠤᠨ ᠠᠮᠢᠰᠬᠤᠭᠠ ᠳᠠᠪᠬᠤᠴᠠᠵᠤ ᠵᠢᠷᠦᠬᠡ ᠨᠢ ᠴᠡᠭᠡᠵᠢᠨᠳᠡᠭᠡᠨ ᠪᠠᠭᠲᠠᠨ ᠶᠠᠳᠠᠨ ᠴᠣᠬᠢᠯᠠᠵᠤ << ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠ ᠲᠠᠢ >> ᠭᠡᠵᠦ ᠰᠡᠳᠬᠢᠯᠳᠡᠭᠡᠨ ᠰᠢᠪᠡᠨᠡᠨ ᠪᠠᠢᠪᠠ᠃ ᠬᠥᠳᠡᠯᠬᠦ ᠭᠡᠲᠡᠯᠡ ᠬᠦᠬᠦᠦᠷᠦᠨ ᠡᠮᠦᠨᠡ ᠪᠠᠢᠭ᠍ᠰᠠᠨ ᠰᠠᠭᠠᠮᠠᠶᠢᠨ ᠬᠣᠪᠢᠩᠳᠦ ᠳᠤᠷᠴᠤ ᠪᠦᠳᠦᠷᠢᠭᠡᠳ ᠪᠠᠳᠠᠷᠴᠢᠶᠢ ᠮᠥᠷᠭᠦᠵᠦ ᠣᠷᠬᠢᠪᠠ᠃
– ᠶᠠᠮᠠᠷ ᠳᠦᠷᠰᠦ ᠦᠭᠡᠢ ᠬᠦᠦ ᠪᠤᠢ᠃ ᠲᠠᠷᠢᠬᠢ ᠦᠭᠡᠢᠳᠡᠭᠡᠳ ᠪᠠᠢᠪᠠᠯ ᠬᠥᠩᠭᠡᠯᠡᠵᠦ ᠤᠷᠬᠢᠨᠠ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠬᠥᠮᠥᠰᠭᠡᠪᠡᠨ ᠰᠦᠷ ᠲᠠᠢ ᠵᠠᠩᠭᠢᠳᠤᠨ ᠪᠦᠳᠦᠭᠦᠨ ᠲᠠᠭᠤᠪᠠᠷ ᠬᠦᠩᠬᠢᠨᠡᠭᠦᠯᠦᠨ ᠬᠡᠯᠡᠪᠡ᠃
ᠬᠣᠩᠭᠣᠷ᠂ ᠪᠠᠳᠠᠷᠴᠢᠡᠴᠡ ᠵᠠᠢᠯᠠᠨ ᠵᠣᠭᠰᠤᠵᠤ᠂ ᠨᠤᠬᠠᠢᠳᠤ ᠰᠢᠬᠠᠭᠤᠯᠤᠭᠰᠠᠨ ᠮᠤᠤᠷᠤᠨ ᠨᠢᠳᠦᠪᠡᠷ ᠪᠠᠳᠠᠷᠴᠢᠶᠢ ᠰᠢᠷᠲᠡᠨ ᠪᠡᠶᠡ ᠪᠡᠨ ᠬᠤᠷᠢᠶᠠᠪᠠ᠃
<<ᠡᠨᠡ ᠯᠠᠪ ᠨᠠᠮᠠᠶ᠋ᠢ ᠲᠡᠮᠦᠷ ᠭᠤᠸᠠᠢ ᠲᠠᠢ ᠠᠭᠤᠯᠵᠠᠭᠰᠠᠨᠢ ᠮᠡᠳᠡᠵᠦ ᠪᠠᠢᠬᠤ ᠰᠢᠭ᠋᠃ ᠪᠢ ᠬᠡᠯᠡᠬᠦ ᠦᠭᠡᠢ᠂ ᠬᠥᠩᠭᠡᠯᠡᠭᠰᠡᠨ ᠴᠤ᠌ ᠬᠡᠯᠡᠬᠦ ᠦᠭᠡᠢ᠃ ᠢᠰᠢᠭᠡ ᠰᠢᠭ᠌ ᠴᠢᠷᠠᠯᠠᠬᠤ ᠦᠭᠡᠢ᠂ ᠬᠤᠷᠠᠭᠠ ᠰᠢᠭ᠋ ᠳᠠᠭᠤ ᠦᠭᠡᠢ ᠪᠠᠢᠵᠤ ᠪᠠᠢᠭᠠᠳ ᠯᠡ ᠪᠤᠰᠤᠭᠠᠳ ᠶᠠᠪᠤᠴᠢᠬᠠᠨᠠ᠃ ᠡᠷᠡ ᠬᠥᠮᠥᠨ᠂ ᠡᠷᠡ ᠬᠥᠮᠥᠨᠳᠡᠭᠡᠨ ᠬᠠᠢᠷᠠ ᠲᠠᠢ>> ᠭᠡᠵᠦ ᠪᠤᠳᠤᠪᠠ᠃
– ᠴᠢ ᠮᠠᠭᠤ ᠬᠥᠩᠭᠡᠯᠡ ᠳᠠ᠃ ᠪᠢ ᠶᠣᠣ ᠭᠡᠬᠦ ᠦᠭᠡᠢ ᠭᠡᠵᠦ ᠬᠣᠩᠭᠣᠷᠤᠨ ᠬᠠᠰᠬᠢᠷᠬᠤᠳᠤ ᠨᠢᠳᠦᠨ ᠳ᠋ᠤᠨᠢ ᠳᠤᠭᠤᠯᠠᠩ ᠨᠢᠯᠪᠤᠰᠤ ᠲᠤᠨᠤᠷᠠᠪᠠ᠃
– ᠪᠡᠯᠡ ᠲᠠᠢ ᠬᠥᠮᠥᠨᠦ ᠭᠠᠭᠴᠠ ᠬᠦᠦ ᠭᠡᠰᠡᠨᠳᠡᠭᠡᠨ ᠰᠢᠷᠪᠦᠰᠦᠲᠠᠢ ᠪᠠᠢᠨᠠ ᠭᠡᠳ ᠪᠠᠳᠠᠷᠴᠢ ᠨᠢᠳᠦᠪᠡᠨ ᠵᠢᠷᠲᠠᠢᠯᠭᠠᠨ ᠢᠨᠢᠶᠡᠪᠡ᠃
– ᠮᠢᠨᠤ ᠬᠦᠦ᠂ ᠲᠤᠮᠤ ᠬᠥᠮᠥᠨ ᠲᠠᠢ ᠢᠩᠬᠢᠵᠦ ᠪᠤᠯᠬᠤ ᠦᠭᠡᠢ ᠭᠡᠵᠦ ᠢᠳᠡᠭᠡᠯᠲᠥ᠍ ᠬᠦᠦᠪᠡᠨ ᠵᠢᠮᠡᠯᠡᠭᠰᠡᠨ ᠪᠤᠯᠪᠠᠴᠤ ᠳᠤᠲᠤᠷᠠᠪᠠᠨ << ᠮᠢᠨᠤ ᠬᠦᠦ ᠴᠤ᠌ ᠶᠠᠭ ᠦᠭᠡᠢ ᠡᠷᠡ ᠪᠤᠯᠤᠨᠠ ᠳᠠ >> ᠭᠡᠵᠦ ᠪᠠᠬᠠᠲᠤᠪᠠ᠃
– ᠰᠢᠷᠢᠲᠠᠢ ᠮᠥᠷᠲᠡᠯᠡᠪᠡᠨ ᠣᠷᠭᠣᠴᠢᠬᠠᠳᠠᠭ᠂ ᠠᠷᠭᠠ ᠦᠭᠡᠢ ᠯᠡ ᠰᠠᠢᠨ ᠡᠷᠡ ᠶᠤᠮ ᠳᠠ ᠭᠡᠵᠦ ᠢᠳᠡᠭᠡᠯᠲᠥ᠍ ᠲᠣᠯᠣᠭᠠᠢᠪᠠᠨ ᠠᠯᠭᠤᠷ ᠰᠠᠵᠢᠯᠠᠪᠠ᠃
– ᠡᠭᠦᠨᠠᠴᠠ ᠡᠮᠦᠨᠡ ᠪᠠᠷᠢᠭ᠍ᠳᠠᠵᠤ ᠪᠠᠢᠭᠠ ᠦᠭᠡᠢ ᠶᠤᠮ ᠰᠢᠦ ᠭᠡᠵᠦ ᠪᠠᠳᠠᠷᠴᠢᠶᠢᠨ ᠬᠡᠯᠡᠬᠦᠳᠦ ᠳᠠᠭᠤᠨ ᠳ᠋ᠤᠨᠢ << ᠭᠡᠪᠡᠴᠦ ᠪᠢ ᠪᠠᠷᠢᠭ᠍ᠰᠠᠨ ᠶᠤᠮ ᠳᠠ >> ᠭᠡᠰᠡᠨ ᠪᠠᠷᠳᠠᠮ ᠥᠩᠭᠡ ᠲᠣᠳᠤᠷᠬᠠᠢ ᠪᠠᠢᠯᠠ᠃ ᠢᠳᠡᠭᠡᠯᠲᠥ᠍ ᠥᠩᠭᠡᠷᠡᠭᠰᠡᠨ ᠵᠢᠯ ᠬᠣᠰᠢᠭᠤ ᠲᠠᠮᠠᠭᠠᠶᠢᠨ ᠵᠢᠰᠢᠶᠠᠨᠤ ᠬᠢᠨᠳᠠᠨᠳᠤ ᠲᠡᠮᠦᠷ ᠲᠠᠢ ᠲᠠᠭᠠᠷᠢᠯᠳᠤᠵᠠᠢ᠃ ᠡᠷᠡ ᠬᠥᠮᠥᠨ ᠬᠡᠵᠢᠶᠡ ᠨᠢᠭᠡᠨ ᠴᠠᠭᠲᠤ ᠡᠨᠳᠡᠭᠳᠡᠯ ᠪᠣᠯᠵᠤ ᠬᠢᠨᠳᠠᠨᠳᠤ ᠵᠠᠪᠠᠯ ᠣᠷᠣᠳᠠᠭ ᠭᠡᠵᠦ ᠤᠷᠢᠳᠤᠶᠢᠨ ᠬᠥᠮᠥᠨ ᠶᠠᠷᠢᠳᠠᠭ ᠪᠤᠯᠬᠤᠷ << ᠶᠠᠭᠤᠮᠠᠶᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠤᠢ？>> ᠭᠡᠵᠦ ᠪᠣᠳᠣᠭᠰᠠᠨ ᠢᠳᠡᠭᠡᠯᠲᠥ᠍ ᠡᠭᠡᠯᠵᠢᠪᠡᠨ ᠥᠩᠭᠡᠷᠡᠭᠦᠯᠬᠦ ᠭᠡᠵᠦ ᠭᠢᠨᠳᠠᠨᠤ ᠬᠤᠶᠠᠭ ᠨᠠᠷᠲᠤ ᠬᠠᠬᠤᠤᠯᠢ ᠥᠭᠴᠦ ᠬᠠᠭᠠᠰ ᠡᠳᠦᠷ ᠲᠠᠮᠠᠭᠠᠶᠢᠨ ᠵᠢᠰᠢᠶᠠᠨᠤ ᠭᠢᠨᠳᠠᠨᠳᠤ ᠰᠠᠭᠤᠵᠤ ᠲᠡᠨᠳᠡ ᠪᠠᠢᠭᠠ ᠬᠣᠷᠢᠭ᠍ᠳᠠᠯᠤᠳᠢ ᠬᠣᠭᠣᠯᠠᠯᠠᠭᠣᠯᠵᠣ᠌ ᠪᠠᠢᠬᠤᠳᠠᠭᠠᠨ ᠰᠢᠷᠢᠯᠡᠭᠦᠯᠦᠭᠰᠡᠨ ᠲᠡᠮᠦᠷ ᠲᠠᠢ ᠲᠤᠬᠢᠶᠠᠯᠳᠤᠵᠤ ᠬᠣᠭᠣᠯᠠ ᠥᠭᠬᠦ ᠵᠠᠭᠤᠷᠠ ᠬᠡᠳᠦᠨ ᠦᠭᠡ ᠴᠤ᠌ ᠰᠤᠯᠢᠵᠠᠢ᠃
ᠲᠡᠮᠦᠷᠦᠨ ᠲᠤᠬᠠᠢ ᠶᠠᠷᠢᠶᠠᠶᠢ ᠰᠣᠨᠣᠰᠬᠣ᠌ ᠲᠣᠰᠤᠮ ᠬᠣᠩᠭᠣᠷᠤᠨ ᠰᠡᠳᠬᠢᠯᠳᠦ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠬᠠᠷᠬᠠᠯ ᠣᠪᠤᠯᠵᠠᠨ ᠬᠦᠭᠡᠷᠴᠦ << ᠲᠡᠮᠦᠷ ᠭᠣᠸᠠᠢ ᠨᠠᠮᠠᠶ᠋ᠢ ᠡᠷᠡ ᠬᠥᠮᠥᠨ ᠭᠡᠰᠡᠨ ᠰᠢᠦ >> ᠭᠡᠵᠦ ᠪᠣᠳᠣᠭᠳᠠᠵᠤ ᠪᠠᠢᠵᠠᠢ᠃ ᠭᠠᠳᠠᠨᠠᠡᠴᠡ ᠨᠢᠮᠠ ᠠᠭᠠᠷᠤᠤᠯ ᠪᠦᠪᠦᠳᠦᠨᠡᠨ ᠬᠦᠯᠬᠦᠭᠰᠡᠭᠡᠷ ᠤᠷᠤᠵᠤ ᠢᠷᠡᠯᠡ᠃
– ᠲᠠ ᠪᠦᠬᠦᠨᠦ ᠠᠮᠤᠭᠤᠯᠠᠩᠢ ᠠᠢᠯᠠᠳᠬᠠᠶᠠ᠃ ᠲᠠᠷᠭᠤᠨ ᠲᠠᠪᠠᠲᠠᠢ ᠵᠤᠰᠠᠯᠠᠵᠤ ᠪᠠᠢᠨᠠ ᠦᠦ？
– ᠰᠠᠢᠨ᠂ ᠰᠠᠢᠨ ᠪᠠᠢᠨᠠ ᠦᠦ？ ᠪᠤᠷᠤᠭᠠᠨ ᠡᠯᠪᠡᠭ ᠲᠠᠢ ᠰᠠᠢᠬᠠᠨ ᠵᠤᠨ ᠪᠤᠯᠵᠤ ᠪᠠᠢᠨᠠ᠃
– ᠪᠠᠳᠠᠷᠴᠢ ᠲᠠᠬᠠᠷ ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠨᠠ ᠳᠠ？
– ᠴᠠᠬᠢᠭᠤᠷ ᠲᠡᠮᠦᠷᠢ ᠠᠯᠳᠠᠴᠢᠬᠠᠭᠠᠳ ᠡᠷᠢᠵᠦ ᠶᠠᠪᠤᠨᠠ᠃ ᠨᠢᠮᠠ ᠭᠣᠸᠠᠢ ᠦᠵᠡᠭᠡᠳ ᠦᠭᠬᠦ ᠦᠭᠡᠢ ᠦᠦ？ ᠭᠡᠵᠦ ᠪᠠᠳᠠᠷᠴᠢᠶᠢᠨ ᠬᠡᠯᠡᠬᠦᠳᠦ << ᠮᠠᠨᠤ ᠨᠢᠮᠠ ᠭᠣᠸᠠᠢ ᠴᠤ᠌ ᠰᠢᠷᠠᠭᠰᠠᠨ ᠮᠢᠬᠠ ᠠᠨᠳᠤᠬᠤ ᠦᠭᠡᠢ ᠰᠢᠷᠠ ᠵᠢᠷᠤᠬᠠᠢᠴᠢ ᠳᠠ >> ᠭᠡᠳ ᠢᠳᠡᠭᠡᠯᠲᠥ᠍ ᠶᠣᠵᠣᠯᠠᠨ ᠢᠨᠢᠶᠡᠪᠡ᠃
– ᠬᠥᠭᠰᠢᠷᠡᠭᠰᠡᠨ ᠶᠤᠮ ᠦᠦ᠂ ᠮᠡᠳᠡᠬᠦᠪᠡᠨ ᠪᠤᠯᠢᠭᠠᠳ ᠲᠥᠭᠡᠷᠢᠬᠦ ᠨᠢ ᠶᠡᠬᠡ ᠪᠤᠯᠤᠭᠰᠠᠨ ᠪᠠᠢᠨᠠ ᠪᠢᠯᠡ ᠭᠡᠳ ᠨᠢᠮᠠ ᠡᠪᠦᠷᠠᠴᠠᠪᠠᠨ ᠨᠠᠨᠳᠢᠩᠨᠠᠨ ᠭᠡᠯᠬᠢᠭᠰᠡᠨ ᠶᠢᠰᠦᠨ ᠵᠤᠭᠤᠰᠢᠶᠠᠨ ᠭᠠᠷᠭᠠᠵᠤ ᠰᠢᠪᠰᠢᠨ ᠦᠯᠢᠶᠡᠬᠦᠳᠡᠭᠡᠨ ᠵᠠᠷᠢᠮᠳᠠᠭᠠᠨ ᠨᠢᠳᠦᠪᠡᠨ ᠠᠨᠢᠵᠤ᠂ ᠵᠠᠷᠢᠮᠳᠠᠭᠠᠨ ᠬᠤᠰᠢᠭᠤᠪᠠᠨ ᠴᠤᠷᠪᠤᠢᠯᠭᠠᠨ ᠶᠡᠬᠡ ᠯᠡ ᠲᠦᠪᠰᠢᠨ ᠳᠦᠷᠢ ᠦᠵᠡᠬᠦᠯᠪᠡ᠃
– ᠵᠠ ᠳᠠ ᠬᠠᠴᠢᠨ ᠶᠤᠮ ᠳᠠ᠃ ᠥᠪᠡᠷᠢᠶᠡᠨ ᠯᠡ ᠴᠢᠨᠦ ᠭᠠᠷᠲᠦ ᠤᠷᠤᠰᠬᠤ ᠶᠤᠮ ᠰᠢᠭ᠋ ᠪᠠᠭᠤᠭᠠᠳ ᠪᠠᠢᠨᠠ᠃ ᠬᠥᠯ ᠨᠢ ᠮᠣᠬᠣᠷᠳᠡᠵᠤ ᠬᠠᠷᠠ ᠠᠷᠰᠯᠠᠨᠤ ᠠᠮᠠᠨᠳᠤ ᠨᠠᠷᠠ ᠵᠢᠷᠭᠠᠬᠤᠶᠢᠨ ᠡᠮᠦᠨᠡ ᠣᠷᠣᠬᠣ᠌ ᠪᠣᠯᠤᠯᠲᠠᠢ ᠭᠡᠳ ᠨᠢᠮᠠ ᠵᠤᠭᠤᠰᠢᠶᠠᠨ ᠬᠡᠯᠬᠢᠵᠤ ᠡᠪᠦᠷᠲᠦᠯᠡᠪᠡ᠃
ᠪᠠᠳᠠᠷᠴᠢ ᠲᠣᠮᠣ᠌ ᠬᠤᠯᠤ ᠠᠢᠷᠠᠭᠢ ᠨᠢᠭᠡ ᠠᠮᠢᠰᠬᠤᠭᠠᠪᠠᠷ ᠵᠠᠯᠭᠢᠵᠤ ᠤᠷᠬᠢᠭᠠᠳ ᠳᠠᠮᠳᠢᠨᠢᠶᠠᠨ ᠳᠠᠭᠠᠭᠤᠯᠤᠨ ᠶᠠᠪᠤᠵᠠᠢ᠃ ᠬᠣᠩᠭᠣᠷ ᠬᠡᠳᠦᠢᠪᠡᠷ ᠲᠡᠮᠦᠷᠢ ᠡᠨᠡ ᠮᠠᠭᠤ ᠬᠣᠶᠠᠷ ᠪᠠᠷᠢᠵᠤ ᠴᠢᠳᠡᠬᠤ ᠦᠭᠡᠢ᠃ ᠲᠡᠮᠦᠷ ᠭᠣᠸᠠᠢ ᠡᠳᠡᠨᠢ ᠳᠠᠯᠦ ᠳᠡᠭᠡᠷᠡᠠᠴᠠ ᠨᠢ ᠪᠠᠷᠢᠵᠤ ᠳᠠᠯᠠᠨ ᠭᠤᠷᠪᠠ᠂ ᠭᠣᠶᠠ ᠳᠡᠭᠡᠷᠡᠠᠴᠠ ᠨᠢ ᠪᠠᠷᠢᠵᠦ ᠭᠤᠴᠢᠨ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠰᠢᠳᠡᠵᠦ ᠣᠷᠬᠢᠨᠠ ᠭᠡᠵᠦ ᠢᠳᠡᠭᠡᠪᠡᠴᠦ᠂ ᠰᠡᠳᠬᠢᠯ ᠨᠢ ᠵᠤᠪᠠᠨ ᠪᠠᠢᠨ ᠪᠠᠢᠨ ᠬᠤᠢᠲᠤ ᠵᠢᠯᠠᠭᠠ ᠣᠷᠣᠭᠣ᠌ ᠬᠠᠷᠠᠵᠤ ᠪᠠᠢᠯᠠ᠃
ᠢᠳᠡᠭᠡᠯᠲᠥ᠍᠂ ᠠᠳᠤᠭᠤᠴᠢᠨ ᠨᠠᠷᠢᠶᠠᠨ ᠴᠤᠭᠯᠠᠭᠤᠯᠵᠤ << ᠲᠠᠮᠠᠭᠠᠨ ᠳᠡᠭᠡᠷᠡᠠᠴᠠ ᠴᠠᠬᠢᠭᠤᠷ ᠲᠡᠮᠦᠷᠢ ᠠᠯᠳᠠᠵᠤ ᠭᠡᠨᠡ᠃ ᠠᠳᠤᠭᠤᠪᠠᠨ ᠰᠦᠨᠢ ᠪᠦᠷᠢ ᠬᠣᠶᠠᠷ ᠬᠥᠮᠥᠨ ᠮᠠᠨᠠᠵᠤ ᠪᠠᠢ᠃ ᠬᠡᠳᠦᠨ ᠠᠳᠤᠭᠤ ᠴᠤ᠌ ᠶᠠᠭᠠᠮᠠᠢ᠃ ᠬᠠᠷᠢᠨ ᠭᠠᠭᠴᠠ ᠨᠢᠭᠡᠪᠡᠷᠢᠶᠡᠨ ᠲᠡᠮᠦᠷ ᠲᠠᠢ ᠲᠠᠭᠠᠷᠢᠯᠳᠤᠪᠠᠯ ᠣᠰᠣᠯ ᠲᠠᠢ >> ᠭᠡᠯᠡ᠃
ᠢᠳᠡᠭᠡᠯᠲᠥ᠍ᠶᠢᠨ ᠬᠢᠠᠴᠠ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠢᠬᠤᠳᠠᠭᠠᠨ << ᠬᠦᠭᠡᠷᠦᠬᠦᠢ ᠠᠬᠠ ᠮᠠᠨᠤᠪᠡᠨ ᠠᠪᠤ ᠰᠢᠭ᠋ ᠯᠡ ᠪᠢᠳᠡᠨᠦ ᠲᠥᠯᠦᠭᠡ ᠵᠤᠪᠠᠵᠤ ᠪᠠᠢᠬᠤ ᠶᠤᠮ >> ᠭᠡᠵᠦ ᠭᠠᠯᠰᠠᠩ ᠬᠡᠯᠡᠪᠡ᠃
– ᠮᠠᠨᠢ ᠢᠳᠡᠭᠡᠯᠲᠥ᠍ ᠬᠤᠶᠠᠷ ᠪᠣᠳᠣᠯ ᠲᠠᠢ ᠬᠥᠮᠥᠨ ᠳᠠ᠃ ᠠᠯᠲᠠᠪᠠᠨ ᠪᠤᠳᠤᠬᠤᠳᠤ ᠠᠪᠳᠠᠷᠠᠪᠠᠨ ᠪᠤᠳᠤᠨᠠ ᠭᠡᠭᠴᠢᠪᠡᠷ ᠠᠳᠤᠭᠤᠪᠠᠨ ᠪᠤᠳᠤᠬᠤᠳᠤ ᠮᠠᠨᠢᠪᠡᠨ ᠪᠤᠳᠤᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠨᠢᠮᠠ ᠠᠵᠢᠭ᠋ ᠦᠭᠡᠢ ᠬᠡᠯᠡᠪᠡ᠃
