ᠮᠢᠨᠤ ᠨᠤᠲᠤᠭ
– ᠳ᠂ ᠨᠠᠴᠤᠭᠳᠣᠷᠵᠢ
ᠬᠡᠨᠲᠠᠢ᠂ ᠬᠠᠩᠭᠠᠢ᠂ ᠰᠠᠶᠠᠨᠤ ᠥᠨᠳᠦᠷ ᠰᠠᠢᠬᠠᠨ ᠨᠢᠷᠤᠭᠤᠨᠤᠭᠤᠳ
ᠬᠣᠢᠲᠤ ᠵᠦᠭᠦᠨ ᠴᠢᠮᠡᠭ ᠪᠣᠯᠤᠭᠰᠠᠨ ᠤ᠌ᠢ ᠬᠥᠪᠴᠢᠨ ᠠᠭᠤᠯᠠᠨᠤᠭᠤᠳ
ᠮᠠᠨᠠᠨ᠂ ᠰᠢᠷᠭᠠ᠂ ᠨᠣᠮᠢᠨᠤ ᠥᠷᠭᠡᠨ ᠶᠡᠬᠡ ᠭᠣᠪᠢᠨᠤᠭᠤᠳ
ᠡᠮᠦᠨᠡ ᠵᠦᠭᠦᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ ᠡᠯᠡᠰᠦᠨ ᠮᠠᠩᠬᠠᠨ ᠳᠠᠯᠠᠢᠨᠤᠭᠤᠳ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠭᠡᠷᠦᠯᠦᠨ᠂ ᠣᠨᠣᠨ᠂ ᠲᠤᠤᠯᠠᠶᠢᠨ ᠲᠤᠩᠭᠠᠯᠠᠭ ᠠᠷᠢᠭᠤᠨ ᠮᠥᠷᠡᠨᠨᠦᠭᠦᠳ
ᠬᠣᠲᠠᠯᠠ ᠤᠯᠠᠨᠤ ᠡᠮ ᠪᠣᠯᠤᠭᠰᠠᠨ ᠭᠣᠷᠤᠬᠠ ᠪᠣᠯᠠᠭ ᠷᠠᠰᠢᠶᠠᠨᠨᠤᠭᠤᠳ
ᠬᠥᠪᠰᠦᠭᠦᠯ᠂ ᠣᠪᠰᠣ᠌᠂ ᠪᠦᠢᠷᠦᠨ ᠭᠦᠨ ᠴᠡᠩᠭᠡᠷ ᠨᠠᠭᠤᠷᠤᠳ
ᠬᠦᠮᠦᠨ ᠮᠠᠯᠤᠨ ᠣᠮᠳᠠᠭᠠ ᠪᠣᠯᠤᠭᠰᠠᠨ ᠲᠣᠭᠤᠷᠢᠮ ᠪᠦᠷᠢᠳᠦ ᠤᠰᠤ ᠨᠤᠭᠤᠳ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠣᠷᠬᠤᠨ᠂ ᠰᠡᠯᠡᠩᠭᠡ᠂ ᠭᠦᠬᠦᠢᠶᠢᠨ ᠣᠨᠴᠠ ᠰᠠᠢᠬᠠᠨ ᠭᠣᠣᠯᠤᠳ
ᠠᠭᠤᠷᠬᠠᠢᠶᠢᠨ ᠪᠠᠶᠠᠯᠢᠭ᠋ᠤᠨ ᠣᠬᠢ ᠣᠯᠠᠨ ᠠᠭᠤᠯᠠ ᠳᠠᠪᠠᠭᠠᠨᠨᠤᠭᠤᠳ
ᠬᠠᠭᠤᠴᠢᠨ ᠬᠦᠰᠢᠶᠡ ᠲᠤᠷᠠᠰᠬᠠᠯ ᠬᠣᠲᠠ ᠪᠠᠯᠭᠠᠳᠤᠨ ᠰᠠᠭᠤᠷᠢᠨᠨᠤᠭᠤᠳ
ᠬᠣᠯᠠ ᠭᠠᠵᠠᠷᠠ ᠣᠳᠤᠭᠰᠠᠨ ᠬᠠᠷᠭᠤᠢ ᠳᠠᠷᠳᠠᠩ ᠵᠠᠮᠤᠳ
ᠡᠨᠡ ᠪᠣᠯ ᠮᠢᠨᠦ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠬᠣᠯᠠᠬᠢ ᠭᠠᠵᠠᠷᠠᠴᠠ ᠭᠢᠯᠠᠯᠵᠠᠭᠰᠠᠨ ᠴᠠᠰᠤᠲᠤ ᠥᠨᠳᠦᠷ ᠬᠠᠢᠷᠬᠠᠨᠨᠤᠭᠤᠳ
ᠬᠥᠬᠡ ᠲᠡᠭᠷᠢ ᠴᠡᠯᠮᠡᠢᠭᠰᠡᠨ ᠬᠥᠳᠡᠭᠡ ᠬᠡᠭᠡᠷᠡ ᠴᠠᠢᠳᠠᠮᠤᠳ
ᠬᠣᠯᠠᠶᠢᠨ ᠪᠠᠷᠠ ᠬᠠᠷᠠᠭᠳᠠᠭᠰᠠᠨ ᠨᠣᠶᠠᠨ ᠱᠤᠪᠬᠤ ᠰᠠᠢᠷᠳᠠᠭᠤᠳ
ᠬᠦᠮᠦᠨᠦ ᠰᠡᠳᠬᠢᠯ ᠲᠡᠨᠡᠢᠭᠰᠡᠨ ᠠᠭᠤᠳᠠᠮ ᠠᠮᠢᠰᠬᠤᠯᠲᠤ ᠲᠠᠯᠠᠨᠤᠭᠤᠳ
ᠡᠨᠡ ᠪᠣᠯ ᠮᠢᠨᠦ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠤᠷᠤᠨ
ᠬᠠᠩᠭᠠᠢ ᠭᠣᠪᠢᠶᠢᠨ ᠬᠣᠭᠤᠷᠤᠨᠳᠤ ᠬᠠᠯᠬᠠᠶᠢᠨ ᠠᠭᠤᠳᠠᠮ ᠨᠤᠲᠤᠭ
ᠬᠠᠷᠠ ᠪᠠᠭᠠ ᠨᠠᠰᠤᠨᠠᠴᠠᠪᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠲᠠᠪᠬᠢᠭ᠍ᠰᠠᠨ ᠭᠠᠵᠠᠷ
ᠭᠥᠷᠦᠭᠡᠰᠦ ᠠᠷᠢᠶᠠᠲᠠᠨ ᠠᠪᠠᠯᠠᠭᠰᠠᠨ ᠤᠷᠲᠤ ᠤᠷᠲᠤ ᠰᠢᠯᠢᠨᠦᠭᠦᠳ
ᠬᠥᠯᠦᠭ ᠮᠣᠷᠢᠳ ᠤᠷᠤᠯᠳᠤᠭᠰᠠᠨ ᠬᠥᠨᠳᠡᠢ ᠰᠠᠢᠬᠠᠨ ᠬᠣᠭᠤᠯᠠᠢᠨᠤᠭᠤᠳ
ᠡᠨᠡ ᠪᠤᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠰᠠᠯᠬᠢᠨᠤ ᠦᠵᠦᠭᠦᠷᠲᠦ ᠨᠠᠢᠭᠤᠭᠰᠠᠨ ᠰᠣᠷᠭᠤᠭ ᠨᠠᠷᠢᠨ ᠨᠣᠭᠤ ᠲᠠᠢ
ᠰᠠᠷᠠᠭᠤᠯ ᠲᠠᠯᠠᠳᠤ ᠢᠷᠠᠯᠵᠠᠭᠰᠠᠨ ᠰᠤᠨᠢᠨ ᠶᠠᠩᠵᠤᠶᠢᠨ ᠵᠡᠷᠭᠡᠯᠭᠡ ᠲᠠᠢ
ᠰᠠᠢᠨ ᠡᠷᠡᠰ ᠴᠤᠭᠯᠠᠷᠠᠭᠰᠠᠨ ᠪᠠᠢᠴᠠ ᠪᠡᠷᠬᠡ ᠭᠠᠵᠠᠷ ᠲᠠᠢ
ᠰᠦᠯᠳᠡ ᠲᠠᠬᠢᠯᠭᠠ ᠤᠯᠠᠷᠢᠭ᠍ᠰᠠᠨ ᠰᠥᠮᠪᠥᠷ ᠶᠡᠬᠡ ᠤᠪᠤᠭᠠ ᠲᠠᠢ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠨᠠᠷᠢᠨ ᠡᠪᠡᠰᠦ ᠤᠷᠭᠤᠭᠰᠠᠨ ᠮᠠᠯᠤᠨ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠲᠠᠢ
ᠢᠨᠠᠭ᠍ᠰᠢ ᠴᠢᠨᠠᠭ᠍ᠰᠢ ᠰᠦᠯᠵᠢᠬᠦ ᠲᠡᠨᠢᠭᠡᠷ ᠰᠠᠢᠬᠠᠨ ᠨᠢᠷᠤᠭᠤ ᠲᠠᠢ
ᠳᠥᠷᠪᠡᠨ ᠴᠠᠭᠤᠨ ᠤᠯᠠᠷᠢᠯ ᠳ᠋ᠤᠷ ᠳᠤᠷᠠᠪᠠᠷᠢᠶᠠᠨ ᠨᠡᠭᠦᠬᠦ ᠨᠤᠲᠤᠭ ᠲᠠᠢ
ᠲᠠᠪᠤᠨ ᠵᠦᠢᠯᠦᠨ ᠲᠠᠷᠢᠶᠠᠨᠤ ᠬᠥᠷᠦᠰᠦ ᠰᠢᠷᠤᠢᠲᠤ ᠭᠠᠵᠠᠷ ᠲᠠᠢ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠥᠯᠦᠭᠡᠢ ᠰᠠᠢᠬᠠᠨ ᠠᠭᠤᠯᠠᠨ ᠳ᠋ᠤᠷ ᠡᠪᠦᠭᠡᠳᠢ ᠲᠠᠯᠪᠢᠭ᠍ᠰᠠᠨ ᠭᠠᠵᠠᠷ
ᠦᠷᠡ ᠠᠴᠢ ᠬᠡᠦᠬᠡᠳᠦᠨ ᠦᠷᠡᠵᠢᠵᠦ ᠦᠰᠦᠭᠰᠡᠨ ᠣᠷᠤᠨ
ᠲᠠᠪᠤᠨ ᠬᠤᠰᠢᠭᠤ ᠮᠠᠯᠤᠳ ᠲᠦᠭᠦᠷᠡᠩ ᠪᠡᠯᠴᠢᠭᠰᠡᠨ ᠨᠤᠲᠤᠭ
ᠮᠣᠩᠭᠣᠯ ᠬᠦᠮᠦᠨ ᠪᠢᠳᠡᠨᠦ ᠰᠡᠳᠬᠢᠯᠢ ᠰᠤᠷᠤᠭᠰᠠᠨ ᠣᠷᠤᠨ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠡᠪᠦᠯᠦᠨ ᠲᠡᠰᠬᠢᠮᠡ ᠴᠠᠭ ᠲᠤᠷ ᠮᠥᠰᠦᠨ ᠪᠦᠷᠬᠦᠭᠡᠳ
ᠪᠣᠯᠤᠷ ᠰᠢᠯᠦᠨ ᠥᠩᠭᠡᠨ ᠭᠢᠯᠲᠦᠭᠡᠨᠡᠵᠦ ᠭᠢᠯᠠᠯᠵᠠᠭᠰᠠᠨ ᠤᠷᠤᠨ
ᠵᠤᠨᠤ ᠨᠠᠢᠷᠲᠠᠢ ᠤᠯᠠᠷᠢᠯ ᠳ᠋ᠤᠷ ᠴᠡᠴᠡᠭ ᠨᠠᠪᠴᠢᠨ ᠳᠡᠯᠭᠡᠷᠡᠭᠡᠳ
ᠵᠢᠭᠦᠷᠲᠡᠨ ᠰᠢᠪᠠᠭᠤᠳ ᠬᠣᠯᠠᠠᠴᠠ ᠢᠷᠡᠵᠤ ᠭᠠᠩᠭᠠᠷ ᠭᠣᠩᠭᠣᠷ ᠳᠣᠩᠭᠤᠳᠤᠭᠰᠠᠨ ᠤᠷᠤᠨ
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠠᠯᠲᠠᠢ᠂ ᠬᠢᠩᠭᠠᠨ ᠬᠣᠶᠠᠷᠤᠨ ᠵᠠᠪᠰᠠᠷ ᠲᠤᠷ ᠠᠲᠠᠷ ᠪᠠᠶᠠᠯᠢᠭ᠋ ᠣᠷᠤᠨ
ᠠᠪᠤ ᠢᠵᠢᠢᠶᠢᠨ ᠮᠢᠨᠢ ᠣᠷᠤᠰᠢᠭ᠍ᠰᠠᠨ ᠠᠰᠢᠲᠠᠶᠢᠨ ᠵᠠᠶᠠᠭᠠᠭᠰᠠᠨ ᠨᠤᠲᠤᠭ
ᠠᠯᠲᠠᠨ ᠨᠠᠷᠠᠨᠤ ᠲᠤᠶᠠᠭᠠᠨ ᠳ᠋ᠤᠷ ᠡᠩᠬᠡᠵᠢᠨ ᠲᠣᠭᠲᠠᠨᠢᠭ᠍ᠰᠠᠨ ᠣᠷᠤᠨ
ᠮᠥᠩᠭᠦᠨ ᠰᠠᠷᠠᠨᠤ ᠭᠡᠷᠡᠯ ᠳ᠋ᠤᠷ ᠮᠥᠩᠬᠡᠵᠢᠨ ᠭᠢᠯᠠᠯᠵᠠᠭᠰᠠᠨ ᠭᠠᠵᠠᠷ
ᠡᠨᠡ ᠪᠣᠯ ᠮᠢᠨᠦ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠾᠦᠩᠨᠦ ᠰᠢᠶᠦ᠋ᠩᠨᠦᠶᠢᠨ ᠦᠶᠡᠡᠴᠡ ᠬᠥᠭᠰᠢᠳ ᠡᠪᠦᠭᠡᠳᠦᠨ ᠮᠢᠨᠢ ᠨᠤᠲᠤᠭ
ᠬᠥᠬᠡ ᠮᠣᠩᠭᠣᠯᠤᠨ ᠴᠠᠭ ᠲᠤᠷ ᠬᠦᠴᠦᠷᠬᠡᠭ ᠣᠷᠤᠨ
ᠣᠨ ᠣᠨ ᠳ᠋ᠤᠷ ᠢᠳᠡᠭᠡᠰᠢᠵᠤ ᠣᠯᠠᠨ ᠵᠢᠯ ᠳ᠋ᠤᠷ ᠳᠠᠰᠤᠭᠰᠠᠨ ᠨᠤᠲᠤᠭ
ᠣᠳᠤᠶᠢᠨ ᠰᠢᠨᠡ ᠮᠣᠩᠭᠣᠯᠤᠨ ᠤᠯᠠᠭᠠᠨ ᠲᠣᠭ ᠪᠦᠷᠬᠦᠭᠰᠡᠨ ᠣᠷᠤᠨ
ᠡᠨᠡ ᠪᠤᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
ᠥᠰᠦᠭᠰᠡᠨ ᠲᠥᠷᠦᠭᠰᠡᠨ ᠪᠢᠳᠡᠨᠦ ᠦᠨᠳᠦᠰᠦᠨ ᠬᠠᠢᠷᠠᠲᠠᠢ ᠨᠤᠲᠤᠭ
ᠥᠩᠭᠡᠯᠵᠡᠭᠴᠢ ᠳᠠᠢᠰᠤᠨ ᠢᠷᠡᠪᠡᠰᠦ ᠢᠰᠭᠦᠯᠦᠨ ᠬᠥᠭᠡᠭᠡᠮᠦᠢ
ᠬᠣᠪᠢᠲᠠᠢ ᠡᠨᠡ ᠣᠷᠤᠨᠳᠠᠭᠠᠨ ᠬᠣᠪᠢᠰᠬᠠᠯᠲᠤ ᠤᠯᠤᠰᠢᠶᠠᠨ ᠮᠠᠨᠳᠤᠭᠤᠯᠵᠤ
ᠬᠣᠢᠴᠢᠶᠢᠨ ᠰᠢᠨᠡ ᠶᠢᠷᠳᠢᠨᠴᠤ ᠳᠡᠭᠡᠷᠡ ᠬᠥᠨᠳᠦᠲᠠᠢ ᠭᠠᠪᠢᠶᠠᠶᠢ ᠪᠠᠢᠭᠤᠯᠤᠶᠠ᠃
ᠡᠨᠡ ᠪᠣᠯ ᠮᠢᠨᠤ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠣᠯᠤᠨ ᠰᠠᠢᠬᠠᠨ ᠣᠷᠤᠨ
